وینکوور اولمپکس: میڈل ٹیبل پر سوئٹزرلینڈ آگے

تب تک دوسرے اور تیسرے نمبر پر امریکہ اور فرانس تھے جن کے کھلاڑی سونے کے دو دو تمغے جیت چکے تھے۔ مجموعی طور پر وینکوور میں مقامی وقت کے مطابق پیر کی شام تک چودہ شعبوں میں سونے، چاندی اور کانسی کے کل بیالیس میڈل دئے جا چکے تھے اور اپنے کھلاڑیوں کے تمغوں کی مجموعی تعداد کے حوالے سے، جو آٹھ بنتی تھی، امریکہ پہلے نمبر پر تھا۔ ان میں سونے اور چاندی کے دو دو اور کانسی کے چار میڈل شامل تھے۔

وینکوور اولمپکس کے تیسرے روز کے زیادہ تر مقابلے مکمل ہو جانے کے بعد میڈل ٹیبل پر جرمنی چوتھے نمبر پر تھا جس کے کھلاڑی تب تک چار میڈل جیت چکے تھے۔ ان میں سونے کا ایک اور چاندی کے تین میڈل شامل تھے۔

وینکوور کے نواح میں سائپریس ماؤنٹین کے مقام پر پیر کی شام مکمل ہونے والے مرد کھلاڑیوں کے اسنو بورڈنگ کے کراس مقابلوں میں پہلی پوزیشن امریکہ کے ٹونی ویسکاٹ نے حاصل کی۔ دوسرے نمبر پر کینیڈا کے مائیک روبرٹسن اور تیسرے نمبر پر فرانس کے ٹونی راموئیں رہے۔

امریکی کھلاڑی سیتھ ’ٹونی‘ ویسکاٹ کے بارے میں خاص بات یہ ہے کہ وہ ان مقابلوں میں اپنے اس اعزاز کا دفاع کر رہے تھے جو انہوں نے چار سال قبل اٹلی کے شہر ٹیورین میں اسنو بورڈنگ کراس مقابلوں میں گولڈ میڈل کے ساتھ حاصل کیا تھا۔

تینتیس سالہ اولمپک چیمپئین ویسکاٹ نے نہ صرف سائپریس ماؤنٹین میں اپنے اعزاز کا کامیابی سے دفاع کیا بلکہ وہ ونٹر اولمپکس کی تاریخ میں اس شعبے میں دو مرتبہ گولڈ میڈل حاصل کرنے والے پہلے کھلاڑی بھی بن گئے۔ وینکوور میں دوسری مرتبہ اولمپک چیمپئین بننے والے ٹونی ویسکاٹ اسنو بورڈنگ کے کراس مقابلوں کے عالمی چیمپئین بھی رہ چکے ہیں۔

رپورٹ: مقبول ملک

ادارت: شادی خان سیف