ٹاپ آرڈر پھر ناکام ، ویسٹ انڈیز کی گرفت مضبوط

بارش سے متاثرہ پہلے دن کے دوران صرف 73.2 اوور ہی ممکن ہو سکے۔ پہلے دن کے کھیل کے دوران ویسٹ انڈیز کے بولروں کی عمدہ بولنگ نے پاکستانی بلے بازوں کو پریشان کر دیا۔ ایک مرتبہ پھر روی رام پال اور بشو نے عمدہ بولنگ کا مظاہرہ کیا اور پاکستانی ٹیم کے اوپنر کوئی بہتر کارکردگی دکھانے میں ناکام ہو گئے۔

پاکستان نے ٹاس جیت کر پہلے بیٹنگ کا فیصلہ کیا تاہم اوپنر کھلاڑی توفیق عمر اور محمد حفیظ کے ساتھ ٹو ڈاؤن بلے باز اسد شفیق جلد ہی آؤٹ ہو گئے۔

کپتان مصباح الحق جب بیٹنگ کرنے کے لیے آئے، تو چوبیس اسکور پر تین کھلاڑی آؤٹ ہو چکے تھے۔ توفیق عمر 8، محمد حفیظ 11 جبکہ اسد شفیق کوئی اسکور بنائے بغیر ہی آؤٹ ہوئے۔ ان تینوں کو روی رام پال نے آؤٹ کیا۔

مصباح الحق اور اظہرعلی نے کچھ ذمہ دارانہ بلے بازی کا مظاہرہ کیا لیکن مصباح الحق 25 کےانفرادی اسکور پر دیویندر بشو کی ایک عمدہ گیند پر آؤٹ ہو گئے۔ اس وقت پاکستان کا مجموعی اسکور 74 تھا۔

بعد ازاں عمراکمل اور اظہر علی نے ٹیم کو سہارا دیا اور مجموعی اسکور167 تک پہنچا دیا۔ دونوں نے پانچویں وکٹ کی شراکت میں 93 رنز بنائے۔ عمر اکمل نے 56 رنز بنائے جبکہ اظہر علی 67 بنا کر آؤٹ ہوئے۔ ان دونوں کے آؤٹ ہونے سے قبل بارش کی وجہ سے میچ کئی مرتبہ روکنا پڑا۔

کم روشنی کی وجہ سے جب پہلے دن کا کھیل مقررہ اوورز سے پہلے ہی روکنا پڑا، تو پاکستانی ٹیم نے چھ وکٹوں کے نقصان پر 180 رنز بنائے تھے۔ پہلے دن کے اختتام پر وکٹ کیپر بلے باز محمد سلمان 8 جبکہ آل راؤنڈر عبدالرحمان 1 کے انفرادی اسکور پر ناٹ آؤٹ تھے۔

دو ٹیسٹ میچوں کی اس سیریز کے پہلے ٹیسٹ میچ میں ویسٹ انڈیز نے پاکستان کو شکست دی تھی۔ اس وقت میزبان ٹیم کو اس سیریز میں ایک صفر سے برتری حاصل ہے۔

رپورٹ: عاطف بلوچ

ادارت: عاطف توقیر