ٹرین حادثہ، مال گاڑی کا ڈرائیور شامل تفتیش

جرمن خبررساں ادارے ڈی پی اے نے جرمن حکام کا حوالہ دیتے ہوئے کہا ہے کہ مال بردار گاڑی کے ڈرائیور سے کی جانے والی ابتدائی تفتیش میں غفلت برتنے کی وجہ سے قتل کے عوامل پرغور کیا جا رہا ہے۔

ہفتہ کی شب ماگڈے برگ میں یہ حادثہ اس وقت رونما ہوا تھا، جب ایک مال بردار ریل گاڑی، مخالف سمت سے آتی ہوئی مسافر بردار گاڑی سے ٹکڑا گئی تھی۔ مال بردار گاڑی پر زرعی اراضی کو زرخیز کرنے والا 27 سو ٹن سفید چونا لدا ہوا تھا۔

پولیس اس امکان پر غور کر رہی ہے کہ آیا مال بردار گاڑی کے ڈرائیور نے سرخ اشارہ توڑا تھا، جس کی وجہ سے یہ حادثہ پیش آیا۔ عینی شاہدین کے مطابق جب یہ حادثہ پیش آیا تو مسافر بردار گاڑی کا سگنل گرین تھا۔ بتایا جاتا ہے کہ سنگل ٹریک پر جب امدادی ٹیمیں پہنچیں تو اس وقت بھی مسافر بردار گاڑی کا سگنل گرین ہی تھا۔ جس مقام پر یہ حادثہ پیش آیا ہے وہاں ایسے حفاظتی انتظامات بھی نہیں تھے، جن کے تحت اگر کوئی ریل گاڑی ریڈ سگنل توڑے تو خود کار نظام کے تحت اسے روک دیا جائے۔

ماگڈے برگ کے دفتراستغاثہ کے مطابق مال بردار گاڑی کے ڈرائیور کے خلاف غفلت برتنے کی نتیجے میں قتل اور نقصان پہنچانے کےعلاوہ ریلوے ٹریفک قانون کی پامالی کے ممکنہ الزامات پر غور جاری ہے۔ حادثے میں گیارہ مسافروں سمیت مسافر بردار ریل گاڑی کا ڈرائیور بھی ہلاک ہو گیا تھا۔

پولیس نے بتایا ہے کہ 23 زخمیوں میں سے دو کی حالت تشویشناک ہے۔ اس حادثے میں جارجیا، قزاقستان، پرتگال اور برازیل کا ایک ایک باشندہ بھی ہلاک شدگان میں شامل ہے۔ ابھی ہلاک ہونے والوں میں سے تین کی شناخت ہو سکی ہے جبکہ باقی لاشوں کے مسخ ہونے کی وجہ سے شناخت میں مشکل پیش آ رہی ہے۔

رپورٹ: عاطف بلوچ

ادارت: شادی خان سیف