پاکستان: جوہری پلانٹس کا تحفظاتی معائنہ ہوگا

پاکستان کی جوہری اتھارٹی نے متعلقہ اداروں کا حکم دیا ہے کہ وہ چشمہ اور کراچی کے جوہری پلانٹس کے تحفظ کے حوالے سے ان کا مکمل معائنہ کروائیں۔ یہ ہدایات جاپان میں زلزلے اور سونامی سے فوکوشیما میں جوہری پلانٹس کو پہنچنے والے ناقابلِ تلافی نقصان اور اس کے نتیجے میں جوہری تابکاری کے اخراج کے بعد پیدا ہونے والی صورتِ حال کے تناظر میں کیا گیا ہے۔

دنیا بھر میں جوہری صلاحیت رکھنے والے ممالک پر اقوامِ متحدہ کے ادارہ برائے جوہری توانائی اور غیر سرکاری تنظیموں کا دباؤ ہے کہ وہ اپنے جوہری پلانٹس کو محفوظ بنانے کے لیے اقدامات کریں اور زلزلے یا کسی اور قدرتی آفت کے نتیجے میں ممکنہ جوہری خطرات سے نمٹنے کے لیے پیشگی کارروائی کریں۔

واضح رہے کہ پاکستان میں سن 2005 میں ایک خوفناک زلزلہ آ چکا ہے جس کے نتیجے میں پاکستان کے شمالی علاقوں میں کم از کم 73 ہزار افراد ہلاک ہوئے تھے تاہم اس زلزلے سے ملک کے جوہری پلانٹس کو کوئی نقصان نہیں پہنچا تھا۔

پاکستان کی نیوکلیئر ریگولیٹری اتھارٹی کا کہنا ہے کہ وہ فوکوشیما کے جوہری حادثے اور اس حوالے سے جاپانی حکومت کی کارروائیوں کا جائزہ لیتی رہے گی اور اس ضمن میں وہ متعلقہ اداروں کو تحفظاتی اقدامات کرنے کی ہدایات بھی دیتی رہے گی۔

جوہری اتھارٹی کے مطابق پاکستان کے جوہری پلانٹس بین الاقوامی معیارات کے مطابق تعمیر کیے گئے ہیں اور ان کو کوئی غیر معمولی خطرہ لاحق نہیں ہے۔

رپورٹ: شامل شمس⁄ خبر رساں ادارے

ادارت: عابد حسین