پرتگال کا مالی بحران : برطانیہ براہ راست مدد نہیں کرے گا

برطانوی وزیر خزانہ جارج اوسبورن نے کہا ہے کہ پرتگال حکومت نے یورپی یونین سے ہنگامی مالی امداد کی اپیل کی جس پر لزبن کو تقریبا اسی بلین یورو یا ایک سو پندرہ بلین امریکی ڈالر کی ہنگامی امداد مہیا کرنے کا فیصلہ کر لیا گیا ہے۔

تاہم انہوں نے کہا کہ لندن حکومت کی طرف سے لزبن کو دو طرفہ بنیادوں پر قرضہ نہیں دیا جائے گا۔ ہنگری کے دارالحکومت بوداپیسٹ میں یورپی یونین کے وزراء خزانہ کے ایک اجلاس کے بعد برطانوی وزیر مالیات نے کہا ،’’لندن حکومت نے یورپی ملکوں پر واضح کر دیا ہے کہ آئرلینڈ کا معاملہ مختلف تھا تاہم برطانیہ پرتگال کو دو طرفہ بنیادوں پر کوئی ہنگامی قرضہ نہیں دے گا برطانوی ٹیکس دہندگان کی ادا کردہ رقوم پرتگال کو براہ راست قرضوں کے طور پر مہیا نہیں کی جائیں گی۔‘‘

اس موقع پر برطانوی وزیر خزانہ نے یہ بات بھی زور دے کر کہی کہ لندن حکومت کو ملک کے سالانہ بجٹ میں بے تحاشا خسارے پر قابو پانے کے لیے فوری اقدامات کی ضرورت ہے۔

جارج اوسبورن یہ وضاحت کرنے پر اس لیے مجبور ہو گئے ہیں کہ برطانیہ کے بجٹ میں بےتحاشا خسارہ وہاں قدامت پرستوں اور لبرل ڈیموکریٹس کی مخلوط حکومت اور اپوزیشن کی لیبر پارٹی کے درمیان شدید تنازعے کی وجہ بھی بنا ہوا ہے۔

رپورٹ: عصمت جبیں

ادارت: شادی خان سیف