پشاوری چپل میں بھی پی ٹی آئی اور نون لیگ کے درمیان مقابلہ

پشاورکی نمک منڈی میں قائم پشاوری چپل کی سب سے بڑی اور قدیمی مارکیٹ میں اگر ایک طرف عمران خان سے منسوب ’کپتان چپل‘ کی مانگ عروج پر ہے تو دوسری طرف قیمتی چمڑے سے تیار کردہ نوازشریف اور شہباز شریف کے لیبل کے ساتھ چپل بھی عوام کو اپنی طرف راغب کر رہی ہے۔

پاکستان تحریک انصاف کے چیئرمین عمران خان کے پشاوری چپل میں دلچسپی اور استعمال کے بعد اس خاص ڈیزائن میں تیار کردہ چپل کو ملک بھر میں ایک الگ شناخت حاصل ہوگئی ہے۔ نوجوان طبقہ اس کو فیشن اور سٹائل کے لئے استعمال کررہے ہیں۔ تاہم حال ہی میں متعارف کئے جانے والے شریف برادر کے ناموں سے منسوب پشاوری چپل کو بھی کافی پسند کیا جارہا ہے۔

پشاور کی چپل مارکیٹ میں آئے ہوئے ایک شخص محمدعرفان کا کہنا تھا کہ اُسے سیاست میں عمران خان بہت پسند ہیں، لیکن وہ نواز شریف (چپل)خرید رہا ہے کیونکہ کپتان چپل کا ریٹ بہت ذیادہ ہے۔محمد عرفان کے مطابق کپتان چپل غیر معمولی وزنی ہے اور اِس کے مقابلے نوازشریف چپل ہلکی اور اس کا سٹائل بھی نیا دکھائی دیتا ہے۔

سید حسن علی شاہ قریب چالیس سالوں سے پشاور کے جہانگیرپورہ بازار میں چپل بنانے کے کاروبار سے وابستہ ہیں، ان کا کہنا ہے کہ ماضی کے مقابلے میں گزشتہ دو سالوں میں اس کاروبار میں کافی تیزی آئی ہے، جس کی بڑی وجہ ’کپتان چپل‘ ہے۔ حسن علی کے مطابق عمران خان کے چپل پہنے کے بعد دنیا بھر میں اس کی طلب میں جہاں پاکستان میں اضافہ ہوا ہے وہیں پر افعانستان، متحدہ عرب عمارات، برطانیہ، جرمنی، اٹلی اور امریکہ سے لوگ ڈیمانڈ کررہے ہیں۔ ‘‘ حسن علی شاہ مزید کہتے ہیں کہ مارکیٹ میں نواز شریف اور شہباز شریف چپل بھی تیار کی جارہی ہے جس کی مانگ صوبہ پنجاب نسبتا زیادہ ہے۔

پشاور شہر کے جہانگیرہ پور بازار کے چپل ساز کا کہنا ہے کہ کپتان چپل میں تھوڑا بہت سیاست اور اپنے پسندیدہ لیڈر کا عنصر ضرور ہے ، لیکن مختلف برینڈ میں لوگوں کی اپنی پسند اور ناپسند، چمڑے کی کوالٹی اور بناوٹ بھی شامل ہے ۔ ان کے بقول مارکیٹ میں تین سو سے لیکر کئی ہزار روپے تک چپل دستیاب ہیں، تاہم ذیادہ تر لوگ کپتان چپل کی طلب کرتے ہیں، جس کی کم سے کم قیمت چار ہزار روپے ہے۔

حسن علی شاہ کا یہ بھی کہنا ہے کہ کپتان چپل کے مقابلے میں شریف برادران سے منسوب چپل کی قیمت کافی کم ہے۔ اور جب شریف برادران چپل تیار کی گئی نو خیال تھا کہ اِس کا بھی اچھا ریٹ ملے گا لیکن یہ خیال غلط ثابت ہوا اور نواز شریف چپل کا ریٹ چودہ سو سے اوپر نہیں گیا البتہ شہباز شریف کا ریٹ اٹھارہ سو تک مل رہا ہے۔ حسن شاہ کا خیال ہے کہ اِس قیمت میں فرق سے اندازہ ہوا ہے کہ پنجاب میں لوگ نواز شریف کے مقابلے میں شہباز کو زیادہ پسند کرتے ہیں۔

گزشتہ پچپن سالوں سے پشاوری چپل کا کاروبار کرنے والے حاجی جہانگیر نے اس عید پر وزیراعظم پاکستان میاں محمد نوازشریف کے لئے چیتے کی کھال سے مہنگے ترین چپل تیار کئے ہیں جو کہ ان کے مطابق عیدالفطر پر نوازشریف کے پیروں کی زینت بنیں گے۔ وہ کہتے ہیں کہ ایک لمبے عرصے سے وہ ملکی سیاست دانوں اور دوسرے مشہور افراد کے لئے اسپیشل قسم کے چمڑے سے جوتے تیار کرتے چلے آرہے ہیں۔ ان کا مزید کہنا ہے کہ ان کے کے بنائے گئے پشاوری چپل باقاعدگی سے گورنر ہاوس کے علاوہ ملک کے دورے پر آئے ہوئے اعلیٰ عہدہ داروں اور سفیروں کو بطور تحائف پیش کئے جاتے ہیں۔ سیاست کے میدان کے علاوہ پشاور کی چپل مارکیٹ میں شاہدآفریدی چپل کی بھی کافی مانگ ہے۔