چوتھا اسلام آباد لٹریچر فیسٹیول

اس لٹریچر فیسٹیول کے لیے لوک ورثہ کمپلیکس اور اس کے راستوں کو رنگا رنگ جھنڈیوں، بینرز اور غباروں سے سجایا گیا تھا۔ مجموعی طور پر اس میلے میں ہزاروں افراد نے شرکت کی۔ افتتاحی تقریب میں سابق پاکستانی وزیر خارجہ حنا ربانی کھر کی شرکت سب سے قابل ذکر تھی۔

امسالہ لٹریچر فیسٹیول میں کتاب بینی کے شوقین ملکی اور غیر ملکی مہمانوں نے بڑی تعداد میں شرکت کی، جن میں اچھی خاصی تعداد خواتین کی بھی تھی۔ میلے کے دوران درجنوں ادبی اور تنقیدی نشستوں کے علاوہ اردو اور انگریزی مشاعروں کا اہتمام بھی کیا گیا۔

گزشتہ چند برسوں سے ہر سال باقاعدگی سے منعقد ہونے والا یہ ادبی میلہ نوجوانوں میں بھی بہت مقبول ہو رہا ہے، جنہوں نے اس سال بھی اس میں بڑی تعداد میں شرکت کی۔

اس میلے میں عام لوگوں کو کتاب بینی کی ترغیب بھی دی گئی، جس کی ایک مثال اس تصویر میں نظر آنے والا دیسی رائٹرز لاؤنج کا یہ اسٹال بھی تھا۔ تصویر میں نظر آنے والے وقاص نعیم ایک ادبی نقاد ہیں، جو دیسی رائٹرز لاؤنج کے ذریعے نئی نسل کو نمائندہ ادب سے متعارف کرانے کا کام کرتے ہیں۔

اس تصویر میں دیکھا جا سکتا ہے کہ کس طرح میلے کے منتظم ادارے نے آکسفورڈ یونیورسٹی پریس کے ذریعے پاکستان کے اردو اور انگریزی زبانوں میں لکھنے والے سرکردہ ادیبوں کو متعارف کرانے کے لیے ان کے تعارفی ہورڈنگز بھی نمائش گاہ میں آویزاں کیے۔

اس تصویر میں پاکستان کے معروف صحافی اور مصنف زاہد حسین لٹریچر فیسٹیول کے دوران لگائے گئے لبرٹی بکس کے اسٹال پر دیکھے جا سکتے ہیں۔

میلے میں موجود ایک ننھا قاری مستنصر حسین تارڑ کی ایک کتاب کا جائزہ لیتے ہوئے۔ انتظار حسین، جن کا مجموعہ اس تصویر میں دیکھا جا سکتا ہے، پچھلے تمام میلوں میں باقاعدگی سے شریک ہوتے تھے لیکن اس بار ان کی کمی خاص طور پر محسوس کی گئی۔ اردو کے عظیم نثر نگاروں میں شمار ہونے والے انتطار حسین اس سال دو فروری کو انتقال کر گئے تھے۔

لوک ورثہ میں اس تین روزہ ادبی میلے نے صرف کتابوں سے محبت کرنے والے افراد کو انفرادی طور پر ہی نہیں بلکہ پورے کے پورے خاندانوں کو یہ موقع مہیا کیا کہ وہ اس میلے کو دیکھیں اور ہر کوئی اپنی پسند کی کتاب خرید سکے۔

اس میلے کا اہتمام کرنے والے ادارے آکسفورڈ پبلشرز کی ڈائریکٹر امینہ سید کے مطابق اس کاوش کا مقصد عوام کے کتابوں سے لگاؤ کو عام کرنا تھا تاکہ ہر طبقہ فکر کے لوگوں میں کتاب دوستی کی ترویج کی جا سکے۔

چوتھے اسلام آباد ادبی میلے میں دوست پبلیکیشنز کا اسٹال۔ مہنگائی کے اس دور میں جب ہر کسی کو کوئی بھی کتاب پچیس فیصد رعایت پر میسر ہو تو اس سے کتاب بینی کی حوصلہ افزائی یقینی سی بات ہے۔

تین روزہ میلے کے دوران جن درجنوں ادبی نشستوں کا اہتمام کیا گیا، ان میں ایک سو اکیاون پاکستانی اور چودہ انٹرنیشنل اسپیکرز نے حصہ لیا۔ اس دوران مجموعی طور پر بیس کتابوں کی رونمائی کی تقریبات بھی منعقد کی گئیں۔ ان نشستوں میں شریک چند بڑے ناموں میں انور مسعود، عارفہ سیدہ زہرہ، حنا ربانی کھر، نسیم زہرہ، کشور ناہید، فہمیدہ ریاض اور آصف فرخی بھی شامل تھے۔

کسی کتاب کی تقریب رونمائی، کوئی تنقیدی نشست یا بھر کسی شاعر یا ادیب کے فن پر بحث، اس میلے کے دوران جتنی بھی ادبی نشستوں کا اہتمام کیا گیا، ان کی خاص بات ان میں ادب پسند قارئین کی بڑی تعداد میں شرکت تھی۔ اس دوران حاضرین کو نئے نئے ادبی رجحانات اور تخلیقی پہلووٴں سے شناسائی کا موقع ملا۔