ڈونلڈ ٹرمپ ریپبلکن صدارتی امیدوار بن گئے

امریکی ریاست اوہائیو کے شہر کلیولینڈ میں ری پبلکن پارٹی کے کنونشن میں امریکی کانگریس کے ایوانِ نمائندگان کے اسپیکر پال رائن نے ڈونلڈ ٹرمپ کی ریاستی پرائمریز میں کامیابی کے تناظر میں انہیں رواں برس کے صدارتی الیکشن کے لیے بطور امیدوار نامزد کیا۔ اِس نامزدگی کے لیے ڈونلڈ ٹرمپ کو ریپبلکن پارٹی کے 1725 ڈیلیگیٹس کی حمایت حاصل ہوئی تھی۔ اُن کو ایک درجن کے قریب امیدواروں کا سامنا تھا۔ ٹرمپ کے قریب ترین حریف ٹیڈ کروز تھے۔

امریکی صدارتی الیکشن کا امیدوار بنانے کے باقاعدہ اعلان کے بعد ڈونلڈ ٹرمپ نے ایک ٹوئٹ پیغام میں کہا کہ یہ اُن کے لیے باعثِ فخر ہے اور وہ تمام تر کاوشوں کے ساتھ اپنی پارٹی اور کارکنوں کو مایوس نہیں ہونے دیں گے۔ انہوں نے اپنے ٹوئٹ میں ’سب سے پہلے امریکا‘ کے نعرے کو بھی شامل کیا۔ امریکی شہر نیویارک کے رہائشی ڈونلڈ ٹرمپ ریئل اسٹیٹ کے کاروبار سے منسلک ہیں۔

کلیولینڈ میں منعقدہ کنونشن میں یہ اعلان بھی کیا گیا کہ صدارتی الیکشن میں مائیک پینس نائب صدر کے امیدوار ہوں گے۔ مائیک پینس پیشےکے اعتبار سے وکیل ہیں اور امریکی ریاست انڈیانا کے گورنر ہیں۔ ریپبلکن پارٹی کی پرائمریز کے دوران وہ ٹیڈ کروز کے ساتھیوں میں سے تھے۔

کنونشن میں پارٹی مندوبین میں اختلافات اور تقسیم کا عنصر نمایاں تھا۔ اِس کنونشن میں ٹرمپ کے مخالف پارٹی مندوبین نے کھلی رائے شماری کرانے کی ایک کوشش بھی کی لیکن وہ اس میں کا میاب نہیں ہو سکے۔ پارٹی کے کئی سینیئر اراکین بھی اس اجلاس میں شریک نہیں تھے۔

بعض ناقدین کے خیال میں ٹرمپ کی اہلیہ میلانیا ٹرمپ کی تقریر پر بھیایک چربہ تھی اور اِس میں کم و بیش ویسے ہی الفاظ استعمال کیے گئے ہیں جیسے مشیل اوباما نے باراک اوباما کی نامزدگی کے موقع پر کہے تھے۔

اِس کنونشن میں ہلیری کلنٹن کے وزیر خارجہ کے دور میں ای میل کے استعمال اور ایف بی آئی پوچھ گچھ کی گونج بھی سنائی دی۔ نیو جرسی کے گورنر کرس کرسٹی نے پارٹی مندوبین کے سامنے ڈیموکریٹک پارٹی کی ممکنہ امیدوار کو ای میل کے تناظر میں مجرم قرار دیتے ہوئے اُنہیں جیل میں بند کرنے کا مطالبہ بھی کیا۔

ہلییری کلنٹن کی نامزدگی اگلے ہفتے کے دوران فلاڈیلفیا شہر میں ہونے والے ڈیموکریٹک پارٹی کے کنونشن میں دی جائے گی۔