کانگو کے باغی رہنما جنرل نکونڈا گرفتار کر لئے گئے

دو ہزار چار سے کانگو کی حکومت کے خلاف مسلح بغاوت کرنے والے باغی رہنما لوراں نکونڈا کو روانڈا کی حدود سے گرفتار کیا گیا۔

روانڈا نے اسی ہفتے کانگو کی فوج کے ساتھ مل کر باغیوں کے خلاف مشترکہ فوجی آپریشن کا آغاز کیا تھا۔ مشترکہ فوجی کمانڈ کے مطابق :’’سابق جنرل لوراں نکونڈا کو جمعرات کی رات روانڈا کی علاقائی حدود میں گرفتار کر لیا گیا۔ اس آپریشن میں تین بٹالین فوجیوں نے حصہ لیا۔‘‘

اس مشترکہ آپریشن کا مقصد مشرقی کانگو میں امن کی بحالی اور روانڈا کے ہوتو قبائل کو غیر مسلح کرنا بتایا گیا ہے۔

مشترکہ فوجی آپریشن میں روانڈا کے تقریبا چار ہزار فوجی حصہ لے رہے ہیں۔ اگرچہ نکونڈا کی گرفتار کانگو میں امن کے قیام کے لئے مثبت پیش رفت سمجھی جا رہی ہے تاہم باغی تاحال مزاحمت میں مصروف ہیں۔ مبصرین نکونڈا کی گرفتار کو افریقہ کے سیاسی منظر نامے میں بڑی تبدیلی سے تعبیر کر رہے ہیں۔