کمیونسٹ ماضی والے پولینڈ میں مذہب سے متعلق نئی بحث

پولینڈ کی مجموعی آبادی 38 ملین کے قریب ہے اور وہ یورپی یونین میں شامل مشرقی یورپی ریاستوں میں سے سب سے زیادہ آبادی و الا ملک ہے۔ ماضی میں سوویت بلاک میں شامل ہونے سے پہلے بھی پولینڈ میں کیتھولک کلیسا کا اثر و رسوخ بہت زیادہ تھا۔ پھر جب پولینڈ میں بھی سوویت یونین کی طرز پر اشتراکی نظام حکومت اپنایا گیا، تو بھی بظاہر لادین ریاست ہونے کے باوجود کیتھولک کلیسا اپنے طور پر عوامی زندگی پر اثر انداز ہوتا رہا۔

لیکن سوویت یونین اور اشتراکی نظام حکومت کے خاتمے کے ساتھ ہی، جب پولینڈ ایک جمہوری ریاست بنا، تو اس ملک میں اور اس کے عوام کے لئے مذہب اور کیتھولک کلیسا کی اہمیت دوبارہ بہت زیادہ ہو گئی۔

اسی سال اپریل میں صدر لیخ کاچنسکی اور 95 دیگر افراد کی روس میں ایک طیارے کے حادثے میں ہلاکت کے بعد سوگوار شہریوں نے ہلاک شدگان کی یاد میں جب وارسا میں صدارتی محل کے باہر اور کئی دیگر جگہوں پر لکڑی کی صلیبیں رکھ دیں، تو اس ملک میں کئی حلقوں کی طرف سے دوبارہ یہ کہا جانے لگا کہ کیتھولک کلیسا کی بڑھتی ہوئی اہمیت کو کم کیا جائے۔

ایسے عوامی اور سیاسی حلقوں کا خیال ہے کہ عوام کے مذہبی رجحانات اپنی جگہ لیکن ایک ریاست کے طور پر پولینڈ کو بھی یورپی یونین کی دیگر ریاستوں کی طرح سیکولر ہونا چاہئے۔ ان حلقوں کی رائے میں ملکی سیاست میں مذہب کے بڑھتے ہوئے کردار کو روکا جانا چاہئے اور چرچ کے اثرورسوخ کو بھی محدود کیا جانا چاہئے۔

پولینڈ کی تاریخ میں رومن کیتھولک کلیسا کے زیادہ تر مثبت اور فیصلہ کن کردار سے بھی انکار نہیں کیا جا سکتا۔ مثال کے طور پر وہاں کیتھولک کلیسا صدیوں تک غیر ملکی قابض قوتوں کے خلاف مزاحمت کا مرکز رہا ہے۔ چند عشرے قبل جب مزدوروں کی ٹریڈ یونین سالیڈیریٹی نے سوویت یونین کے حمایت یافتہ کمیونسٹ نظام حکومت کے خلاف اپنی جدوجہد شروع کی تو بھی اس تحریک کو تحفظ کلیسائے روم کے مقامی نمائندوں نے ہی فراہم کیا تھا۔

پھر دس اپریل کو صدر کاچنسکی کی ہلاکت کے بعد جب ان کے لئے اور ان کے ساتھ ہلاک ہونے والے دیگر افراد کے لئے سوگواری مذہبی تقریبات منعقد کی گئیں تو ملک میں کئی روز تک اکثر کلیسا بھرے ہوئے نظر آئے۔ ملکی دارالحکومت وارسا میں صدارتی محل کے باہر ہلاک شدگان کی یاد میں ایک بہت بڑی صلیب اور پھر ہزاروں شہریوں کی طرف سے مسلسل پھول رکھے جانے کے بعد ایسا لگتا تھا کہ جیسے یہ جگہ کیتھولک مسیحی عقیدے کے حامل سوگوار شہریوں کے لئے مذہبی اہمیت کا ایک مرکز بن گئی ہو۔

اب چار ماہ سے بھی زائد عرصے بعد وارسا میں صدارتی محل کے باہر تین میٹر اونچی یہ صلیب وہیں رکھی ہے اور وہاں عام شہری بڑی تعداد میں موم بتیاں جلانے اور پھول چڑھانے کے لئے آتے ہیں۔ وارسا حکومت اور مقامی کلیسا نے کافی کوشش کی کہ اس یادگاری جگہ کو صدارتی محل کے باہر سے ایک قریبی کلیسا میں منتقل کردیا جائے، لیکن یہ کوششیں اب تک ناکام رہی ہیں۔

اب پولینڈ میں صلیب سے متعلق یہ بحث ملکی سیاست کو دو حصوں میں تقسیم کر چکی ہے۔ ایک طرف انتہائی سوچ کے حامل دائیں بازو کے وہ سیاسی کارکن ہیں، جو باقاعدگی سے وہاں جمع ہوتے ہیں۔ ان کارکنوں کو اپوزیشن کی بڑی اور قوم پسند جماعت پارٹی برائے قانون اور انصاف کے سربراہ یاروسلاو کاچنسکی کی حمایت حاصل ہے۔ لیخ کاچنسکی یاروسلاو کاچنسکی کے جڑواں بھائی تھے۔

دوسری طرف وہ سیاسی اور سماجی حلقے ہیں، جن کی رائے میں پولینڈ میں کلیسا اور سیاست کے ایک دوسرے سے بہت قریبی رابطے اچھے نہیں ہیں۔ وارسا میں پبلک افیئرز انسٹیٹیوٹ کے سربراہ کوشارچک کہتے ہیں کہ پولینڈ میں مذہب اور سیاست کے بہت قریبی رابطوں کا مسئلہ طویل عرصے سے پایا جاتا ہے۔ ’’یہ مسئلہ اتنے طویل عرصے سے پایا جاتا ہے کہ بہت سے شہری اب اسے محسوس ہی نہیں کرتے۔‘‘

پولینڈ میں مذہب سے متعلق بحث اور وارسا میں صدارتی محل کے باہر رکھی گئی صلیب کے حوالے سے تازہ ترین بیان نومنتخب صدر کومورووسکی کا تھا، جنہوں نے اپنے ایک انٹرویو میں امید ظاہر کی کہ صدارتی محل کے باہر رکھی گئی صلیب وہاں سے ہٹا دی جائے گی۔

اسی دوران بائیں بازو کی اپوزیشن یہ شکایت کر رہی ہے کہ ملک میں ’’سیکولرنظریات کا تحفظ اور ملکی آئین کا احترام‘‘ کیا جانا چاہئے، جو ’’فی الحال نہیں کیا جا رہا۔‘‘

رپورٹ:عصمت جبیں

ادارت :شادی خان سیف