’کینسر امریکہ‘ کا خاتمہ کر دیا جائے گا، انڈر ویئر بمبار کی دھمکی

عمر فاروق 2009ء کو کرسمس کے موقع پر ایمسٹرڈیم سے امریکی شہر ڈیٹرائٹ جانے والی نارتھ ویسٹ ایئرلائنز کی فلائٹ میں سوار تھا۔ وہ دھماکہ خیز مواد اپنے زیر جامہ یعنی انڈر ویئر میں چھپائے ہوئے تھا، تاہم یہ دھماکہ خیز مواد پھٹ نہ سکا اور اسے گرفتار کر لیا گیا تھا۔

عمر فاروق عبدالمطلب کو جب ڈیٹرائٹ کی عدالت میں پیشی کے لیے لایا گیا تو اس نے چلا کر کہا ’انور زندہ ہے‘۔ اس کا اشارہ امریکی شہری انور العولقی کی جانب تھا جسے گزشتہ ہفتے یمن میں ایک مبینہ امریکی ڈرون حملے میں ہلاک کر دیا گیا تھا۔

عدالتی کارروائی کے آغاز کے لیے جج کے کمرہء عدالت میں داخل ہونے سے قبل عمرفاروق عبدالمطلب نے ایک بار اسی تلخ لہجے میں چلا کر کہا: ’’مجاہدین امریکہ کو صفحہ ہستی سے مٹا دیں گے، کینسر امریکہ کو۔‘‘

ڈیٹرائٹ جانے والی فلائٹ کو فضا میں ہی دھماکے سے اڑانے کے ملزم عبدالمطلب کا اصرار تھا کہ وہ اپنے مقدمے کی پیروی خود کرے گا۔ تاہم عدالت کی جج نینسی ایڈمنڈزNancy Edmunds نے عبدالمطلب کو بار بار مشورہ دیا کہ وہ کسی وکیل کو اپنا مقدمہ پیش کرنے دے۔ جج نے اس مقصد کے لیے ایک وکیل مقرر بھی کیا کہ وہ نارتھ ویسٹ ایئرلائنز کی فلائٹ میں سوار 300 افراد کو ہلاک کرنے کی کوشش سے متعلق الزامات کے خلاف عبدالمطلب کی مدد کرے۔

تاہم عبدالمطلب نے وکیل انتھونی چیمبرز کی مدد قبول کرتے ہوئے اصرار کیا کہ وہ مقدمے کی کارروائی کے لیے ابتدائی بیان خود دے گا اور یہ کہ گواہوں سے سوالات بھی وہ خود ہی کرے گا۔  اس مقدمے کی کارروائی کئی ہفتوں تک جاری رہ سکتی ہے اور ابتدائی بیانات 11 اکتوبر کو متوقع ہیں۔

رپورٹ: افسر اعوان

ادارت: مقبول ملک