گزشتہ برس چینی فلم صنعت کے لیے ریکارڈ ساز

چین کے سرکاری ذرائع ابلاغ کے مطابق شاندار کارکردگی کے باوجود گزشتہ برس ملکی فلمی صنعت کو ہالی وُڈ کی بلاک بسٹر فلموں سے سخت مقابلے کا سامنا رہا ہے۔

چینی اخبار ’چائنا ڈیلی‘ نے ریڈیو، فلم اور ٹیلی ویژن کے اسٹیٹ فلم بیورو کے حوالے سے بتایا ہے کہ 2010ء میں زیادہ سے زیادہ افراد نے سنیما گھروں کا رُخ کیا، جس کی بدولت نیشنل باکس آفس کی آمدنی تقریباﹰ 64 فیصد زائد رہی ہے۔

اس ادارے کے سربراہ ٹونگ گانگ کا کہنا ہے کہ ڈیڑھ ارب ڈالر کوئی چھوٹی رقم نہیں، لیکن اس کامیابی کو زیادہ اچھالنا بھی مناسب نہیں۔ انہوں نے یہ بھی کہا ہے کہ ’اوتار‘ اور ’اِن سیپشن‘ جیسی کامیاب فلموں کو ٹکر دینا ابھی تک ممکن نہیں ہو سکا۔ انہوں نے بتایا کہ علاقائی کامیاب ترین فلمیں بھی ہالی وُڈ کی اِن بلاک بسٹرز سے بہت پیچھے رہی ہیں۔

خیال رہے کہ چین میں گزشتہ برس سب سے زیادہ بزنس کرنے والی فلم ’آفٹر شاک‘ تھی، جس کی آمدنی 673 ملین یوآن رہی۔

’اَوتار‘ اور ’اِن سیپشن‘ کی آمدنی گزشتہ برس میں چینی باکس آفس کی مجموعی آمدنی کے 20 فیصد کے برابر رہی ہے۔ گانگ تسلیم کرتے ہیں کہ چین میں ابھی تک معیاری فلموں کا فقدان ہے۔

دوسری جانب ’آفٹر شاک‘ کے ڈائریکٹر فینگ شیاؤگانگ اور دیگر ناقدین کا مؤقف ہے کہ ان کی فلموں کا معیار اسٹیٹ ایڈمنسٹریشن آف ریڈیو، فلم اینڈ ٹیلی ویژن کے سینسر کی نذر ہو جاتا ہے، جس کے باعث چینی فلمیں کوئی بھی کمال دکھانے میں ناکام ہو جاتی ہیں۔

گزشتہ برس چین میں 526 فیچر فلمیں بنائی گئیں۔ یہ تعداد 2009ء کے مقابلے میں 15فیصد زیادہ ہے۔ یوں بالی وُڈ اور ہالی وُڈ کے بعد یہ دنیا کی تیسری بڑی فلمی صنعت ہے۔

بیجنگ حکام اس بات پر زور دیتے رہتے ہیں کہ چین کو اپنی ثقافتی صنعتوں کو وسیع کرنے کی ضرورت ہے، جو مجموعی ملکی پیداوار کے دو فیصد کے برابر ہیں۔

رپورٹ: ندیم گِل/خبررساں ادارے

ادارت: افسر اعوان