ہابرماس کا شخصی خاکہ

اپنے سماجی نظریات کے لئے بے شمار بین الاقوامی اعزازات حاصل کرنے والے ہابرماس کو ہارورڈ یونیورسٹی کی جانب سے ڈاکٹریٹ کی ڈگری حاصل کرنے کا اعزاز بھی ہے۔ 1955ء میں رشتہ ازدواج میں بندھنے والے ہابرماس تین بچوں کے باپ ہیں۔

سیاسیات، سماجیات اور اقتصادیات کے شعبوں کا ناقدانہ نظر سے جائزہ لینے والے ہابرماس کی فلسفیانہ تحریریں، جن کے تراجم 23 سے زیادہ زبانوں میں ہوچکے ہیں، دنیا بھر میں شوق سے پڑھی جاتی ہیں۔ اپنے علمی سفر کے دورا ن انہوں نے دنیا بھر میں مختلف ممالک کے دورے بھی کئے۔ ان ممالک میں چین، امریکہ اور ایران خصوصی طور پر شامل ہیں، جہاں دانشوروں اور طالب علموں نے ان کی زبردست پذیرائی کی۔

ہابرماس نے اپنے دور کے مشہور اساتذہ Theodor Adorno اور Max Hoekheimer سے تعلیم حاصل کی اور انہی کے اس مشہور ناقدانہ سماجی نظریے کو آگے بڑھایا، جس میں معاشرے کے بارے میں خیالات و افکار کی تشکیل کے لئے ٹھوس تاریخی حالات و واقعات اور عوامل کو بنیاد بنایا جاتا ہے۔ اس نظریے کو فرینکفرٹ مکتبہء فکر کا نظریہ بھی کہا جاتا ہے۔

ساٹھ کے عشرے کے اواخر میں ہابرماس کی تحریروں کے اثرات خاص طور پر اس دور کے طالبعلموں نے قبول کئے۔ لیکن جب ان میں سے طلبا کا ایک گروہ نسلی انتہاپسندی کی طرف مائل ہوا، تو ہابرماس کو یورپ میں ایک متنازعہ شخصیت کے طور پر دیکھا جانے لگا۔ اس وجہ سے ہابرماس نے طلبا تحریک کے اس انتہاپسند حصے سے کنارہ کشی اختیار کر لی۔

ہابرماس کا یہ نظریہ کہ عالمگیریت کے اس دور میں قومی حکومتوں کی اہمیت ختم ہوتی جا رہی ہے، دنیا بھر کے فکری حلقوں میں بحث کا موضوع رہا ہے ۔ ان کے نظریات میں اس امر کو ہمیشہ مرکزی اہمیت حاصل رہتی ہے کہ جمہوریت کو مستحکم بنیادیں فراہم کی جائیں۔ ہابرماس فرینکفرٹ اسکول کے ساتھ ساتھ ہائیڈل برگ اور اسٹارن برگ میں بھی پڑھاتے رہے ہیں، جبکہ مہمان پروفیسر کے طور پر وہ امریکہ اور فرانس کی یونیورسٹیوں سے بھی وابستہ رہے ہیں۔

رپورٹ انعام حسن

ادارت امجد علی