اپنے ہی جنگجو کو قتل کرنے پر حماس کی مذمت

خبر رساں ادارے اے ایف پی کے مطابق غزہ پٹی پر حکمران ‌حماس کے مسلح وِنگ القسیم بریگیڈ کی طرف سے بتایا گیا کہ اس نے اپنے ایک رُکن کو اتوار کے روز قتل کیا۔ اس معاملے کے بارے میں معلومات رکھنے والے ایک ذریعے کے مطابق قتل کیا جانے والا حماس کا ایک سینیئر اہلکار تھا جس پر اسرائیل کے لیے جاسوسی کرنے کا الزام تھا۔

بریگیڈ کی طرف سے جاری ہونے والے ایک بیان کے مطابق، ’’القسیم بریگیڈ اعلان کرتی ہے کہ اس کے رکن محمود ایشتاوی کو سنائی گئی موت کی سزا پر آج عملدرآمد کر دیا گیا ہے۔‘‘

اسرائیل اور فلسطین کے لیے ہیومن رائٹس واچ کے ڈائریکٹر سری باشی نے اس اعلان پر اپنے ردعمل میں اسے ’حماس کی طرف سے ایک اور ماورائے عدالت قتل‘ قرار دیا۔ باشی کے مطابق، ’’اگر حماس واقعی فلسطینی لوگوں کے حقوق کے تحفظ کا خیال رکھتی ہے تو وہ کسی بھی فلسطینی کی قانون اور انصاف کے طریقہ کار سے ہٹ کر اس کو ہلاک کرنے والوں کو سزا دے گی۔‘‘

خبر رساں ادارے اے ایف پی کے مطابق حماس طویل عرصے سے اکثر بغیر شفاف قانونی عمل کے جاسوسی کے الزام میں لوگوں کو ہلاک کرتی رہی ہے۔ تاہم القسیم کی طرف سے یہ بظاہر پہلا موقع ہے کہ اس نے خود سے ہی کورٹ مارشل کر کے کسی کو ہلاک کیا ہے۔

القسیم بریگیڈ کی طرف سے ایشتاوی کے خلاف الزامات کی کوئی تفصیل نہیں بتائی گئی سوائے اس کے کہ ’’بریگیڈ کی ملٹری اور جوڈیشل کمیٹی نے یہ سزا اس لیے دی ہے کہ انہوں نے قواعد اور اخلاقیات کی خلاف ورزی کی‘‘۔

ذرائع کے مطابق ایشتاوی کی ذمہ داریوں میں ان سرنگوں کی نگرانی بھی شامل تھی جو قبل ازیں ہتھیاروں کے ذخیرے اور اسرائیل کے خلاف حملوں کے لیے استعمال ہوتی رہیں۔ اے ایف پی نے اپنے ذرائع کے حوالے سے مزید بتایا ہے کہ ایشتاوی ایک بڑے یونٹ کے انچارج تھے اور قبل ازیں وہ القسیم کے سربراہ محمد ضیف کے کافی قریب رہے ہیں۔ محمد ضیف مبیبہ طور پراسرائیل کی طرف سے قتل کی کئی کوششوں کا ہدف رہے ہیں۔ اے ایف پی کے مطابق 2016ء کے آغاز سے اب تک غزہ کے چار باشندوں کو اسرائیل کے لیے جاسوسی کرنے کے الزام میں سزائے موت دی جا چکی ہے۔