یقین دہانی کے باوجود مبینہ امریکی حملہ، اسلام آباد کا ردعمل

امریکی جوائنٹ چیفس آف اسٹاف ایڈمرل مائیک مولن نے پاکستانی وزیر اعظم سید یوسف رضا گیلانی اور آرمی چیف جنرل اشفاق پرویز کیانی سے ملاقاتوں کے بعد پاکستانی حدود کے احترام کی یقین دہانی کرائی تھی تاہم انہیں پاکستان سے روانہ ہوئے چند گھنٹے ہی گزرے تھے کہ جنوبی وزیرستان میں انگور اڈا کے علاقے باغڑچینا میں مقامی باشندے کے گھر پر مبینہ طور پرمیزائل حملہ کیا گیا۔ پاکستانی وزیر خارجہ شاہ محمود قریشی نےایک خصوصی پریس بریفنگ میں کہا کہ میزائل حملوں سے ایسا لگتا ہے جیسے امریکی فوج اور خفیہ اداروں میں مکمل رابطہ نہیں۔

مشیر داخلہ رحمان ملک نے بھی میڈیا سے گفتگو کرتے ہوئے کہا کہ پاکستانی حدود میں کارروائیوں کے حوالے سےامریکہ کے ساتھ کوئی معاہدہ نہیں کیا گیا۔ پاکستان کی خود مختاری کی حفاظت کے لئے سفارتی کوششوں سمیت ہر ممکن اقدامات اٹھائے جائیں گے۔