آؤشوٹس میں ہزاروں یہودیوں کے قتل کا مقدمہ، تین جرمن جج تبدیل

وفاقی جرمن دارالحکومت برلن سے ہفتہ چوبیس جون کو ملنے والی نیوز ایجنسی ڈی پی اے کی رپورٹوں کے مطابق یہ مقدمہ آؤشوِٹس کے نازی اذیتی کیمپ کے ایک ایسے سابق طبی کارکن کے خلاف ہے، جس کی عمر اس وقت 96 برس ہے، اور عدالتی کارروائی کی سماعت کرنے والے تین ججوں پر الزام تھا کہ وہ جانبدارانہ سوچ کا مظاہرہ کر رہے تھے۔

ڈی پی اے کے مطابق جرمن شہر نوئے برانڈن بُرگ میں ایک صوبائی عدالت کے تین ججوں کو تبدیل کرتے ہوئے کل جمعہ تئیس جون کو اس مقدمے کی سماعت کے لیے تین نئے جج نامزد کر دیے گئے۔ تبدیل کیے گئے ججوں کے خلاف ریاستی دفتر استغاثہ نے شکایت کی تھی کہ وہ ملزم کے خلاف مقدمے کی سماعت کو بار بار ملتوی کرتے رہے تھے۔

’مختلف نسلی گروپوں کا آمیزہ‘: جرمن جج کے خلاف چھان بین شروع

نازی دور میں یہودی قتل عام ’پندرہ افراد کا فیصلہ‘ تھا

تین لاکھ یہودیوں کے قتل میں معاونت: نازی مجرم کی سزا برقرار

یہ مقدمہ ہُوبرٹ سافکے نامی ایک ایسے ملزم کے خلاف ہے، جو بہت ضعیف العمر ہے اور جو قریب تین چوتھائی صدی قبل مقبوضہ پولینڈ میں نازیوں کے قائم کردہ آؤشوِٹس کے اذیتی کیمپ میں ہٹلر کے ایس ایس دستوں کے ایک رکن کے طور پر طبی کارکن کے فرائض انجام دیتا رہا تھا۔

تبدیل کیے گئے ججوں کے بارے میں استغاثہ کی شکایت تھی کہ انہوں نے کئی بار ہُوبرٹ سافکے کے بارے میں یہ رائے دی تھی کہ وہ طبی وجوہات کی بنا پر عدالتی کاروائی کا سامنا کرنے کے قابل نہیں تھا۔ اس طرح یہ کارروائی مسلسل ملتوی ہوتی رہی۔

سافکے پر الزام ہے کہ وہ آؤشوِٹس کے نازی اذیتی کیمپ میں زیادہ تر یہودیوں پر مشتمل 3,681 افراد کے قتل میں مدد کا مرتکب ہوا تھا۔ ملزم کے وکیل کے مطابق اس کے مؤکل نے کسی جرم کا ارتکاب نہیں کیا تھا۔

سابقہ نازی جرمن جنگی قیدی ساری پونجی سکاٹش گاؤں کو دے گیا

روس میں جرمن پارلیمانی عمارت کی نقل، وجہ ’روسی قبضے کی مشق‘

نازی رہنما گوئبلز کی سیکرٹری کا 106 برس کی عمر میں انتقال

عدالتی دستاویزات کے مطابق ہُوبرٹ سافکے کے خلاف اس مقدمے کا تعلق دوسری عالمی جنگ کے دوران 1944ء میں صرف ایک ماہ کے اس عرصے سے ہے، جب سافکے اس نازی کمیپ میں تعینات تھا۔ تب وہاں صرف ایک ماہ میں قریب تین ہزار سات سو انسانوں کو قتل کیا گیا تھا، جو تقریباﹰ سب کے سب یہودی تھے۔ ان قیدیوں کو کھچا کھچ بھری ہوئی 14 مختلف ریل گاڑیوں کے ذریعے آؤشوِٹس کیمپ پہنچایا گیا تھا۔

استغاثہ کے مطابق سات عشروں سے بھی زائد عرصہ قبل کے ان واقعات کے سلسلے میں ہُوبرٹ سافکے پر ہزارہا انسانوں کے قتل میں مدد کا الزام اس لیے عائد کیا گیا کہ تب ایس ایس دستوں میں سافکے کے یونٹ کا ایک کام یہ بھی تھا کہ ان گیس چیمبروں میں زہریلی گیس بھری جائے، جہاں ایک ماہ کے دوران قریب پونے چار ہزار اور چند برسوں کے دوران مجموعی طور پر لاکھوں یہودیوں اور دیگر قیدیوں کو قتل کیا گیا تھا۔