آن لائن ادائیگیوں کے حوالے سے خطرات کا جائزہ

بعض بینکرز کی طرف سے اس بات پر پریشانی کا اظہار کیا گیا ہے کہ آن لائن مارکیٹ میں بعض نئی کمپنیوں کے مالیاتی نظام پر مضر اثرات ہو سکتے ہیں۔ اس ‌حوالے سے فیڈرل ریزرو آفس کی نائب سربراہ جینیٹ یلین Janet Yellen کا کہنا تھا، ’’ہم اس حوالے سے بینکنگ کمپنیوں سے گزشتہ دو برسوں سے بات چیت کرتے رہے ہیں۔ ہم نہایت احتیاط کے ساتھ یہ سمجھنے کی کوشش کر رہے ہیں کہ ادائیگی کے لیے نئے طریقہ ہائے کار کے حوالے سے کیا تحفظات ہو سکتے ہیں۔‘‘

تاہم انہوں نے اس بات کی تردید کی کہ ایسی کمپنیاں بنا کسی قانونی دائرہ کار کے بغیر کام کر رہی ہیں۔ ان کا کہنا تھاکہ امریکا میں بہت سے لوگوں کی سوچ سے بھی زیادہ سخت ریگولیٹری ماحول موجود ہے، خاص طور پر صارف کے تحفظ کے حوالے سے۔

پیر تین جون کو چین کے تجارتی مرکز شنگھائی میں ہونے والی انٹرنیشنل مانیٹری کانفرنس سے خطاب کرتے ہوئے جینیٹ یلین کا کہنا تھا، ’’اصل بات یہ ہے کہ امریکا میں ایسے قوانین موجود ہیں جو پے پال اور دیگر آن لان ادائیگی کی سروسز فراہم کرنے والوں پر اطلاق ہوتا ہے۔‘‘

پے پال دراصل امریکا کی معروف انٹرنیٹ ریٹیل سروس eBay کا حصہ ہے جو آن لائن ادائیگی کی سہولت فراہم کرتا ہے۔ جینیٹ یلین کا مزید کہنا تھا کہ آن لائن ادائیگیوں کا سلسلہ امریکی حکومت کی نظروں میں ہے اور اس سے وابستہ خطرات کا محتاط جائزہ لیا جا رہا ہے۔

گزشتہ ماہ امریکی حکام نے بِٹ کوائن ڈیجیٹل کرنسی ایکسچینج آپریٹر کی ایک کمپنی Mutum Sigillum LCC کا اکاؤنٹ یہ کہہ کر منجمد کر دیا تھا کہ یہ لائسنس کے بغیر ادائیگی کی سروسز فراہم کر رہی تھی۔ بٹ کوائن 2009ء میں عالمی اقتصادی بحران کے دوران ایک نامعلوم پروگرامر کی طرف سے قائم کی گئی تھی۔ اس کا مقصد ایک ایسی کرنسی قائم کرنا تھا جو کسی بھی مرکزی بینک یا مالیاتی ادارے سے مبراء ہو۔

بعض ماہرین کو خطرہ ہے کہ ورچوئل کرنسی جرائم پیشہ افراد یا دہشت گردوں کے کام آ سکتی ہے یا یہ ہیکرز کے ہتھے بھی چڑھ سکتی ہے۔ گزشتہ ماہ امریکی حکومت نے کوسٹا ریکا میں قائم لبرٹی ریزرو نامی کمپنی کے خلاف غیر قانونی طور پر رقوم کی منتقلی کے الزامات کے تحت تحقیقات بھی شروع کی ہیں۔ اس پر الزام ہے کہ اس نے حکومتی کنٹرول سے باہر کہیں بڑی رقوم منتقل کی ہیں۔

aba/ai (AFP)