امریکی سینما میں اندھا دھند فائرنگ میں تین افراد ہلاک

نیوز ایجنسی روئٹرز کی جمعے کی صبح ملنے والی رپورٹوں کے مطابق یہ واقعہ عالمی وقت کے مطابق جمعرات اور جمعے کی درمیانی شب بارہ بجے اور مقامی وقت کے مطابق جمعرات شام سات بجے پیش آیا۔ پولیس کے مطابق اس واقعے میں ایک مسلح شخص نے ’ٹرین رَیک‘ Trainwreck نامی فلم کے ایک شو کے دوران سینما میں فلم بینوں کے ہجوم پر فائر کھول دیا۔

فائرنگ کے نتیجے میں دو افراد ہلاک اور سات دیگر زخمی ہوئے، جس کے فوری بعد حملہ آور نے فائرنگ کے لیے استعمال کی گئی ہینڈ گن کے ذریعے خود کشی کر لی۔ روئٹرز کے مطابق یہ واقعہ امریکی ریاست کولوراڈو میں ’اورورا‘ کے مقام پر پیش آنے والے اس واقعے کے تقریباﹰ ٹھیک تین سال بعد پیش آیا ہے، جس میں اسی طرح کے ایک حملے میں ایک سینما میں ایک مسلح حملہ آور نے فائرنگ کر کے 12 افراد کو قتل کر دیا تھا۔

گزشتہ رات لوئیزیانا میں پیش آنے والے واقعے کے بارے میں لافایَٹ کے پولیس سربراہ جِم کرافٹ نے صحافیوں کو بتایا کہ اس فائرنگ کے کچھ ہی دیر بعد پولیس اہلکار موقع پر پہنچ گئے تھے لیکن تب تک 58 سالہ مشتبہ قاتل سینما کے اندر کئی فلم بینوں کو نشانہ بنانے کے بعد خود کشی کر چکا تھا۔ جِم کرافٹ کے مطابق جو فلم شائقین زخمی ہوئے ہیں، ان میں سے چند کی حالت نازک ہے جبکہ دیگر افراد کی زندگیاں خطرے میں نہیں ہیں۔

تفتیشی ماہرین کے مطابق ابتدائی چھان بین کے بعد وہ خود کشی کر لینے والے مبینہ قاتل کی شناخت کر لینے میں کامیاب ہو گئے ہیں تاہم فی الحال اس کا نام ظاہر نہیں کیا جا سکتا۔ اس کے علاوہ حکام نے اس بارے میں بھی فوری طور پر کچھ کہنے سے انکار کر دیا کہ اس خونریز واقعے کے محرکات کیا ہو سکتے ہیں یا یہ کہ آیا انہیں موقع سے کوئی شواہد بھی ملے ہیں۔

لافایَٹ پولیس کے سربراہ نے کہا، ’’حملہ آور بھی ہلاک ہو چکا ہے۔ بظاہر اس شخص کا مجرمانہ ریکارڈ بھی تھا، جو کافی پرانا تھا۔‘‘ چند عینی شاہدین کے مطابق حملہ آور نے فلم کا شو شروع ہونے کے قریب 20 منٹ بعد، جب سینما ہال کے اندر تمام لائٹیں بند تھیں، اپنی سیٹ سے اچانک کھڑے ہو کر اپنے ارد گرد فائرنگ شروع کر دی تھی۔