انوکھی پیوند کاری: ناممکن ممکن بن گیا

جمہوریہ کانگو میں پیدا ہونے والی اس خاتون کی عمر اُس وقت پانچ برس تھی، جب اُس میں خون کی ایک نہایت پیچیدہ اور خطرناک بیماری ’ سیکل سیل انیمیا‘ کی تشخیص ہوئی تھی۔ یہ خون کے خُلیے میں ہیموگلوبین کی کمی کے باعث پیدا ہونے والی خون کی ایک مہلک بیماری ہے جو زیادہ تر افریقہ اور بحراوقیانوس کے علاقوں میں پائی جاتی ہے۔

یہ خاتون اس وقت11 برس کی تھی جب اُس کی فیملی جمہوریہ کانگو سے یورپی ملک بلجیئم ہجرت کر گئی تھی۔ تب وہ بہت زیادہ بیمار ہو گئی تھی اور اُس کے ڈاکٹروں نے اُس میں اُس کے بھائی کے بون میرو یا ہڈی کے گودے کی پیوند کاری کی تھی۔ ’ سیکل سیل انیمیا‘ کے کم سن مریضوں یا بچوں میں ڈاکٹرز زیادہ تر کیمو تھراپی کی مدد سے خون کی پیداوار کے عمل کو تیز تر کرنے کی کوشش کرتے ہیں تاہم یہ طریقہ علاج اس لیے خطرناک ثابت ہوتا ہے کہ اس کے ضمنی اثرات کے طور پر بچے دانیاں متاثر ہو تی ہیں ۔ کیمو تھراپی انہیں شدید نقصان پہنچا سکتی ہے۔ ڈاکٹروں نے اس خطرے سے بچتے ہوئے اس خاتون ) جو اُس وقت 13 برس کی تھی( کی اووری یا بیضہ دانی کے کچھ ٹشوز نکال کر انہیں جما دیا۔ اُس لڑکی میں مینسز یا حیض شروع نہیں ہوا تھا تاہم بلوغت کی دیگر علامات ظاہر ہونے لگی تھیں۔

ایک دہائی بعد یعنی جب وہ 23 برس کی ہوئی تو ڈاکٹروں نے اُس کی اووری کے منجمد حصے کے کچھ ٹشوز نکال کر اُس کے جسم میں باقی ماندہ بیضہ دانی کے ٹشوز کے ساتھ اُن کی پیوند کاری کردی۔ کچھ ہی عرصے میں پیوندکاری کے عمل سے گزری ہوئی بیضہ دانی میں انڈے نشوونما پانے لگے۔ اُس کے کوئی دو سال سے زائد عرصے کے بعد یہ خاتون حاملہ ہو گئی۔ گزشتہ نومبر میں اس نے ایک سات پاؤنڈ کے مکمل صحت مند لڑکے کو جنم دیا۔

برسلز میں قائم ’ایراسمُس‘ ہسپتال اور امراض نسواں اور باروری کے ریسرچ انسٹیٹیوٹ کی ڈاکٹر ایزابیلے ڈیمیسٹیئر کے بقول،’’یہ ایک نہایت خوشی کا لمحہ تھا۔ مجھے سب سے زیادہ خوشی اپنی مریضہ کے لیے ہو رہی ہے کیونکہ وہ بہت خوفزدہ تھی کہ یہ تجربہ کامیاب نہیں ہو سکے گا۔ اُس کے پاس اس طریقہ کار کے سوا کوئی دوسرا متبادل موجود نہیں تھا، ماں بننے کا‘‘۔

ڈیمیسٹیئر اور اُن کے ساتھی ریسرچرز نے اس کیس کی تفصیلات بُدھ کو ’ہیومن ریپروڈکشن‘ نامی ایک آن لائن جریدے میں منظرعام پر لائی ہیں۔

ماضی میں ایسے کیسس تو سامنے آتے رہے ہیں جن میں ایسی خواتین، جو کسی وجہ سے اووری یا بیضہ دانی کے ٹشوز کو نکلوانے کے بعد ان ٹشوز کی پیوند کاری کے بعد بچوں کو جنم دینے میں کامیاب رہی ہیں تاہم اس سے قبل ایسا پہلے کبھی نہیں ہوا کہ بچپن میں بیضہ دانی کے ٹشوز نکلوا کر منجمد کروانے والی خاتون میں دوبارہ ان ہی ٹشوز کی پیوند کاری کے بعد حاملہ ہونے اور بچے کو جنم دینے میں کامیاب ہوئی ہیں۔

ڈاکٹر ایزابیلے ڈیمیسٹیئر اس بارے میں کہتی ہیں،’’ ہمیں کچھ پتہ نہیں تھا کہ کسی مریض کے اندر اُس کے اپنے منجمد شدہ ٹشوز کی پیوند کاری کے کیسے نتائج نکلیں گے یہ تجربہ بالکل نا پُختہ تھا تاہم جب میں نے اس خاتون میں اس تجربے کے بعد یہ دیکھا کہ اُس میں بیض ریزی کا عمل شروع ہو گیا اور اُس کے ہارمونز کا پروفائل نارمل دکھائی دیا تو مجھے یقین ہو گیا تھا کہ یہ خاتون حاملہ ہو جائے گی‘‘۔