جرمنی کے ایک چرچ میں ’حضرت مریم کے ظہور‘ کا انتظار

گرجا گھر کی انتظامیہ نے اعلان کیا ہے کہ جو کوئی بھی ’مریم مقدس کا دیدار‘ کرنا چاہتا ہے وہ ہفتے کے روز جرمنی کے جنوبی صوبے باویریا کے گاؤں ’اونٹر فلوسنگ‘ میں پہنچ جائے۔ سینٹ لارنس چرچ کے مالک اوٹو ماسیزی کے مطابق ’حضرت مریم سترہ مارچ کو شام ساڑھے چار بجے چرچ میں اتریں‘ گی۔

جرمن نیوز ایجنسی ڈی پی اے کے مطابق اوٹو ماسیزی نے چند برس پہلے یہ چرچ خریدا تھا اور پھر خود ہی اس کی تزیئن و آرائش کی تھی۔ گزشتہ برس ستمبر میں اطالوی خود مختار علاقے سیسلی کے ایک خود ساختہ ’پیغمبر‘ سلواتور کاپوتا نے اس علاقے کا دورہ کیا تھا۔ اس وقت بھی کاپوتا نے اس گاؤں میں ’مریم مقدس کے ظہور‘ کی پیش گوئی کی تھی اور مقررہ وقت پر اس مسیحی فرقے کے ماننے والے ایک سو سے زائد افراد ’زیارت‘ کی خاطر وہاں جمع ہوئے تھے۔ ان شرکا نے دعویٰ کیا تھا کہ انہیں ’ایک خوشبو کی ذریعے مقدس مریم کے ظہور کا احساس‘ ہوا تھا۔ بعدازاں کاپوتا نے یہ پشین گوئی کی تھی کہ اس برس بھی سترہ مارچ ہی کے روز گزشتہ برس کی طرح عین اسی وقت ’حضرت مریم کا دوبارہ اسی جگہ ظہور‘ ہوگا۔

گزشتہ برس اسی طرح کی محفل میں شریک زائرین میں سے ایک کا نیوز ایجنسی ڈی پی اے سے گفتگو کرتے ہوئے کہنا تھا، ’’میں نے حضرت مریم کو ان کی خوشبو سے پہچانا۔‘‘ سینٹ لارنس چرچ کے رہنماؤں اور دوستوں کی ایسوسی ایشن کی خاتون سربراہ ایریش نوئمان کا کہنا تھا، ’’وہاں گلاب کی غیرمعمولی خوشبو تھی۔ وہاں کچھ حیران کن ہوا تھا۔‘‘

 دوسری جانب میونخ میں کیتھولک چرچ کے سرکردہ حکام نے اپنے کسی بھی پادری کو وہاں جانے سے منع کر دیا ہے۔ چرچ کے جاری کردہ بیان کے مطابق کیتھولک چرچ نہیں چاہتا کہ  لوگوں کو یہ تاثر ملے کہ کاپوتا کو کیتھولک چرچ کی حمایت حاصل ہے۔ اس صوبے کے براڈکاسٹر ’بائیرشے رُنڈفونک‘ کے مطابق گزشتہ برس مقامی کیتھولک پادریوں نے بھی ایسی تقریب میں حصہ لیا تھا۔

کیتھولک چرچ ماضی میں ’حضرت مریم کے ظہور‘ کے متعدد واقعات کو باقاعدہ طور پر تسلیم کر چکا ہے۔