سوچتا ہوں کہ مسلمانوں کی طرح روزے رکھا کروں، سرفراز مائیکل

رمضان کے ایک تپتے دن سرفراز مائیکل پاکستانی شہر راولپنڈی میں اپنی سبزی کی ریڑھی کو آہستگی کے ساتھ دھکیل رہا تھا۔ مسیحی مذہب کا پیروکار مائیکل پیاس سے نڈھال اور پسینے میں شرابور ہونے کے باوجود رمضان کے باعث پانی نہیں پی سکتا تھا کیونکہ اُسے اِت مہینے میں دی جانے والے سزا کا احساس تھا۔ پاکستان میں سابق آمر حکمران جنرل ضیاء الحق کے دور میں کی گئی قانون سازی کے مطابق ایسا کرنے کی صورت میں پانچ سو روپے جرمانہ یا تین ماہ تک قید یا پھر دونوں سزائیں ہو سکتی ہیں۔

اِس حالت میں نیوز ایجنسی ڈی پی اے سے گفتگو کرتے ہوئے مائیکل سرفراز نے کہا،’’میں گھر پہنچنے تک انتظار کروں گا یہ پھر کسی ساتھی غیر مسلم کے گھر جا کر پانی پیوں گا۔‘‘

قانون کے مطابق اس بات سے قطع نظر کہ کسی فرد پر روزہ فرض ہے یا نہیں وہ روزے کے دوران عوامی مقامات پر کھلے عام کھا، پی یا تمباکو نوشی نہیں کر سکتا۔ ہائیکورٹ کے وکیل شہباز راجپوت کے مطابق حقیقت میں حکام ان لوگوں کے ساتھ بھی کوئی رعایت نہیں کرتے جنہیں روزہ رکھنے سے استثنیٰ حاصل ہے مثلاﹰ غیر مسلم، عمر رسیدہ افراد یا پھر ایسے مسلمان جو بیمار یا سفر میں ہوں: ’’ان قوانین کے باعث ملک بھر میں تمام ریستوران روزے کے اوقات میں تقریباً بند ہوتے ہیں جس کی وجہ سے ایسے لوگوں کو شدید مشکلات کا سامنا کرنا پڑتا ہے جنہیں ناشتے یا کھانے کی ضرورت ہوتی ہے۔‘‘

تجزیہ کاروں کے مطابق اس قانون کو ہر کسی پر لاگو کرنا بنیادی انسانی حقوق کی خلاف ورزی ہے اور صحت کے حوالے سے شدید پیچیدگیاں پیدا کر سکتا ہے۔ یاد رہے کہ رمضان کے شروع میں گرمی کی شدید لہر کے باعث سندھ میں 1250 سے زائد افراد ہلاک ہو گئے تھے۔ حکومتی بیان کے مطابق زیادہ تر ہلاکتیں اس شدید موسم میں روزہ رکھنے کے باعث ہوئیں۔

اسلام آباد سے تعلق رکھنے والی انسانی حقوق کی کارکن طاہرہ عبداللہ کے مطابق روزہ انسان اور خدا کے درمیان نجی معاملہ ہے اور اسی لیے اس معاملے میں حکومت کو نہیں آنا چاہیے اور حکومت کی طرف سے روزہ رکھنے کے لیے سخت قوانین کا نفاذ نہیں کرنا چاہیے: ’’یہ صرف انسانی حقوق کا ہی مسئلہ نہیں ہے بلکہ صحت سے متعلق مسائل کے حوالے سے بھی ایک بڑا ایشو ہے۔‘‘

پولیس کی جانب سے کریک ڈاؤن اور شدت پسند مسلمانوں کے خوف کے تناظر میں مائیکل سرفراز کہتا ہے، ’’بعض اوقات میں سوچتا ہوں کہ میں بھی رمضان کے دوران مسلمانوں کی طرح روزے رکھنا شروع کر دوں۔‘‘