شادی کی تقریب میں طاقتور دھماکا، ہلاکتیں 18 ہوگئیں

بھارت کی مغربی ریاست راجھستان کے شہر بیوار میں جمعہ 16 فروری کی شب شادی کی ایک تقریب کے دوران ایک گیس سیلنڈر پٹھنے کے سبب نہ صرف ہوٹل کی عمارت ملبے کا ڈھیر بن گئی بلکہ وہاں شدید آگ بھی بھڑک اٹھی۔ اس دھماکے کے فوری بعد امدادی کاموں کا سلسلہ شروع کر دیا گیا تھا۔

ہفتے کی شام حکام کی طرف سے ہلاکتوں کی تعداد نو بتائی گئی تھی۔ تاہم آج اتوار کے روز ہلاک شدگان کی تعداد میں اُس وقت اضافہ ہو گیا جب فوج کی مدد سے امدادی کاموں کے دوران ملبے تلے سے نو مزید افراد کی لاشیں ملیں۔ ان میں بچے اور خواتین بھی شامل ہیں۔

ریاست راجھستان کے ضلع اجمیر کے ایک سینئر اہلکار گوروو گویال کے مطابق، ’’اب تک 18 لاشیں نکالی جا چکی ہیں۔‘‘ خبر رساں ادارے اے ایف پی سے بات کرتے ہوئے گویال کا مزید کہنا تھا، ’’پانچ افراد کا، جن کی حالت تشویشناک ہے، ہسپتال میں علاج جاری ہے۔‘‘

جمعہ کی شب شادی کی تقریب کے دوران ہونے والے اس سیلنڈر کے دھماکے کے سبب تین منزلہ ہوٹل مکمل طور پر تباہ ہو گیا۔ راجھستان کی وزیر اعلیٰ وسوندھارا راجی سکندیا نے گزشتہ شب ہسپتال میں اس حادثے ميں زخمی اور ہلاک ہونے والوں کے لواحقین سے ملاقات کی۔ انہوں نے ہلاک ہونے والے ہر شخص کے خاندان کے لیے دو لاکھ بھارتی روپے کی امداد کا اعلان بھی کیا۔ اپنے ایک ٹوئٹر پیغام میں خاتون وزیر اعلیٰ کا کہنا تھا، ’’بیوار میں شادی کی ایک تقریب کے دوران سیلنڈر کا دھماکا، کسی خوفناک خواب سے کم نہیں۔‘‘

خبر رساں ادارے اے ایف پی کے مطابق بھارت میں گھریلو طور پر استعمال کیے جانے والے گیس سیلنڈر کے دھماکے عام ہیں جس کی ایک وجہ ان کے استعمال کے حوالے سے نا مناسب سیفٹی اسٹینڈرڈز بھی ہیں۔ تاہم اکثر ہونے والے دھماکوں کے باوجود انسانی جانوں کے ضائع ہونے کی خبریں کم کم ہی ملتی ہیں۔