فرانس، ’بارڈر کنٹرول‘ میں مزید چھ ماہ کی توسیع
4 اپریل 2018
فرانسیسی حکومت کے مطابق سرحدی نگرانی کی مدت میں مزید توسیع کے بعد اب رواں برس اکتوبر تک ملکی سرحدوں کی نگرانی کا عمل جاری رہے گا۔ بیلجیم کے دارالحکومت برسلز میں یورپی کمیشن کی ترجمان نے فرانسیسی خبر رساں ادارے اے ایف پی کو بتایا، ’’رواں ہفتے فرانس کی طرف سے یورپی کمیشن کو اس حوالے سے ایک نوٹیفیکیشن موصول ہوا تھا۔‘‘
نومبر 2015ء میں فرانسیسی دارالحکومت پیرس میں داعش کی جانب سے کیے گئے ایک دہشت گردانہ حملے کے بعد ملکی سرحدوں کی نگرانی کا اعلان کیا گیا تھا۔ پیرس حملے کے نتیجے میں ایک سو تیس سے زائد افراد ہلاک ہوئے تھے۔ فرانس میں دہشت گردی کے واقعات میں تسلسل کی وجہ سے پیرس حکومت کی جانب سے ہر چھ ماہ بعد ’بارڈر کنٹرول‘ میں توسیع کا اعلان کیا جا رہا ہے۔
یورپی یونین سرحدوں کی نگرانی سخت کرنے پر متفق
جرمن وزیر داخلہ کا ملکی سرحدوں کی نگرانی سخت کرنے کا مطالبہ
علاوہ ازیں یورپی یونین کے شینگن زون کے چھبیس ممالک میں سے جرمنی، آسٹریا، ڈنمارک، سویڈن اور ناروے کی جانب سے سرحدوں کی نگرانی کا فیصلہ خانہ جنگی کی وجہ سے مغربی یورپ کا رخ کرنے والے لاکھوں مہاجرین کی آمد کے نتیجے میں سامنے آیا تھا۔ تاہم دہشت گردی کے خطرے کی وجہ سے ان پانچوں ممالک نے بھی اپنی سرحدوں پر نگرانی بڑھانے کا فیصلہ کر لیا ہے۔
مہاجرین کو روکنے کے لیے سرحدی نگرانی فوج کے سپرد، آسٹریا
یونانی سرحدی شہر کے مضافات سے دو مہاجرین کی لاشیں برآمد
جرمنی کے نئے وزیر داخلہ ہورسٹ زیہوفر گزشتہ ماہ ایک بیان میں ملکی سرحدوں کی نگرانی میں توسیع کا ذکر کرچکے ہیں۔ وزیر داخلہ کا کہنا تھا کہ جب تک یورپی یونین کی جانب سے یورپ کی بیرونی سرحدوں کی حفاظت کو مؤثر نہیں بنایا جاتا تب تک جرمن سرحدوں کی نگرانی ضروری ہے۔ جرمن وزارت داخلہ کی ترجمان کے مطابق یورپی کمیشن کو سرحدوں کی نگرانی میں توسیع کے حوالے سے ابھی تک آگاہ نہیں کیا گیا۔ تاہم فی الوقت برلن حکومت کی جانب سے صرف آسٹریا سے متصل سرحد پر نگرانی کی جارہی ہے۔
مزید یہ ہے کہ رواں برس ’شینگن زون‘ کے چھبیس ممالک میں سے فرانس پہلا ملک ہے جس نے اپنی سرحدوں پر پاسپورٹ کنٹرول جاری رکھنے کا اعلان کیا ہے۔ خبر رساں ادارے اے ایف پی کی اطلاعات کے مطابق ’شینگن زون‘ کے دیگر ممالک میں آسٹریا کی جانب سے بھی جلد ہی اپنی سرحدوں کی نگرانی کا فیصلہ سامنے آئےگا۔ تاہم آسٹریا کی وفاقی حکومت نے ابھی حتمی طور پر اس بات کا اعلان نہیں کیا ہے۔ واضح رہے شینگن زون میں ایک ملک سے دوسرے ملک میں داخل ہونے کے لیے عموماﹰ پاسپورٹ چیک کرانے کی ضرورت نہیں ہوتی۔
ع آ۔ ع ب۔ (اے ایف پی)