فلوریڈا میں ہم جنس پرستوں کی شادی پر پابندی ختم
6 جنوری 201550 امریکی ریاستوں میں سے فلوریڈا اب 36 ویں ایسی ریاست بن گئی ہے، جہاں ہم جنس پرست جوڑوں کو شادی کی اجازت مل گئی ہے۔ رشتہ ازدواج میں بندھنے والے ولیم لی جونز نے 10 سال کی پارٹنر شپ کے بعد اپنے ساتھی آرون ہنٹسمن سے شادی کرنے کے فوراً بعد ہی اخبار میامی ہیرالڈ کو بیان دیتے ہوئے کہا، "میں خوش ہوں کہ ہمارا رشتہ آخر کار قانونی شکل اختیار کر گیا ہے"۔
قانونی طور پر شادی کرنے والا یہ جوڑا فلوریڈا کے ہم جنس پرست اُن متعدد جوڑوں میں شامل ہے، جس نے اس ریاست کی انتظامیہ پر اس حوالے سے مقدمہ کر رکھا تھا کہ وہ ہم جنس پرستوں کو اُن کے بنیادی حقوق سے محروم رکھے ہوئے ہے۔ امریکا کے ایک ڈسٹرکٹ جج رابرٹ ہینکل نے گزشتہ ہفتے ہم جنس پرستوں کی شادی پر پابندی کے فیصلے کو مسترد کر دیا تھا اور اُن کا کہنا تھا کہ عدالتی اہلکار ریاست کی طرف سے لگی پابندی کے اطلاق کو لازمی نہ سمجھیں۔ اس بارے میں 2008ء میں ووٹروں نے اپنی رائے کے ذریعے منظوری دی تھی۔
گزشتہ سال اگست میں ایک عدالتی فیصلہ سناتے ہوئے ہینکل نے کہا تھا کہ ہم جنس پرستوں کی شادی پر پابندی غیر آئینی ہے۔ انہوں نے اس پابندی کو ماضی میں بین النسلی شادیوں پر لگی پابندی کے برابر قرار دیا تھا جسے 50 برس قبل ختم کر دیا گیا تھا۔
پیر کو فلوریڈا میں ہم جنس پرستوں کی شادی پر پابندی اُٹھنے کے بعد دو مردوں کی شادی کے قانونی اعلان کے بعد متعدد ہم جنس پرست جوڑوں نے سڑکوں پر نکل کر خوشی کا اظہار کیا اور ولیم لی جونز اوراُن کے پارٹنر آرون ہنٹسمن کو شادی کی مبارکباد دی۔ اس موقع پر فلوریڈا کی ویسٹ پام بیچ سے تعلق رکھنے والے دو خواتین پر مشتمل ایک ہم جنس پرست جوڑے نے خوشی کا اظہار کرتے ہوئے اخبار پام بیچ پوسٹ کو ایک بیان دیتے ہوئے کہا کہ انہیں یقین نہیں تھا کہ اُن کی زندگی میں یہ ممکن ہو گا۔ ارما اولیور اور جولیا بُرگ ہیز ایک دہائی تک پارٹنر رہیں جس کے بعد ان کے لیے شادی کرنا ممکن ہوا ہے۔
کیلیفورنیا اور ٹیکساس کے بعد فلوریڈا آبادی کے اعتبار سے امریکا کی تیسری بڑی ریاست ہے۔ فلوریڈا کی کُل آبادی 20 ملین ہے۔ 2013ء میں امریکی سپریم کورٹ نے شادی کے سخت وفاقی قوانین کو ختم کرتے ہوئے دیگر شادیوں کو مخالف جنسوں کے مابین ہونے والی شادیوں کے مساوی تسلیم کرنے کا فیصلہ سنایا تھا۔ اس اقدام سے ہم جنس پرست خواتین اور مرد جوڑوں کو وفاقی قانون کے تحت دیگر جوڑوں کے مساوی حقوق حاصل کرنے کا موقع مل گیا تاہم ابھی بھی کئی امریکی ریاستوں میں ہم جنس جوڑوں کو شادی کی اجازت نہیں ہے۔