پاکستان نیوی پر حملہ اور معروضی صورتِ حال

پاکستان کی بحری فوج نے کٹر مذہبی عقائد رکھنے والے اویس جاکھرانی کو ملازمت سے فارغ کر دیا تھا اور بعد میں اس نے اپنے دو دیگر ساتھیوں کے ہمراہ ایک پٹرول کشتی پر بیٹھ کر جنگی بحری جہاز پی این ایس ذوالفقار کو اغوا کرنے کی کوشش کی۔ ستمبر کے اوائل میں کیے گئے اِس حملے میں جاکھرانی اور اُس کے ساتھیوں کو چوتھے شخص کی معاونت بھی حاصل تھی۔ انتہا پسند گروپ جاکھرانی کے ذریعے اِس پلاننگ میں تھے کہ پی این ایس ذوالفقار کو اغوا کر کے امریکی بحریہ پر حملے کیے جائیں۔ نیوز ایجنسی روئٹرز کے رابطے پر بتایا گیا کہ پاکستان نیوی ستمبر حملے کی محکمانہ انکوائری کا سلسلہ جاری رکھے ہوئے ہے۔

جاکھرانی اوراُس کے ساتھیوں کو جنگی بحری جہاز پی این ایس ذوالفقار پر قبضے کی یہ کوشش مہنگی پڑی اور جوابی کارروائی میں چاروں ہلاک کر دیے گئے۔ پولیس رپورٹس کے مطابق جاکھرانی کے ساتھ ہلاک ہونے والے دو پاکستان نیوی کے حاضر سروس سب لیفٹیننٹ رینک کے افسران تھے۔ سب لیفٹیننٹ نیوی میں ابتدائی افسران کا درجہ ہے۔ حکام کے لیے یہ لمحہٴ فکریہ ہے کہ پاکستان نیوی کے نوجوان افسران کس حد تک اویس جاکھرانی کے لیے حمایت اور ہمدردی رکھتے ہیں۔ حکام کا یہ واضح طور پر کہنا ہے کہ جنگی بحری جہاز کا اغوا کوئی آسان نہیں تھا اور چاروں حملہ آور آخری مقام سے بہت پہلے ہی جوابی کارروائی میں مار دیے گئے تھے۔

اِس حملے کی ذمہ داری بین الاقوامی دہشت گرد نیٹ ورک القاعدہ کی جنوبی ایشیاء کے لیے قائم ہونے والی شاخ نے قبول کی تھی۔ تجزیہ کاروں کا خیال ہے کہ پاکستان نیوی کے جنگی بحری جہاز کے اغوا کی کوشش کوئی معمولی فعل نہیں بلکہ یہ اِس بات کا غماز ہے کہ پاکستانی افواج میں انتہا پسندانہ عقائد کس حد تک سرایت کر چکے ہیں۔

القاعدہ کے ابتدائی اعلان میں بھی جنگی جہاز کو اغوا کرنے کے بعد امریکی تنصیبات کو نشانہ بنانے کا اشارہ دیا گیا تھا۔ بعد میں جاری ہونے والے ایک دوسرے بیان میں بتایا گیا کہ پاکستانی بحری جہاز سے امریکی جنگی بحری جہاز ’یُو ایس ایس سپلائی‘ کو نشانہ بنانا مقصود تھا کیونکہ یہ بحری جہازوں کو ایندھن فراہم کرنے پر مامور ہے۔ جہادی معاملات پر نگاہ رکھنے والے سائٹ (SITE) انٹیلیجنس گروپ کا خیال ہے کہ مسلمان جہادی اب خشکی کے ساتھ ساتھ سمندر میں اپنی کارروائیاں شروع کرنے پر توجہ مرکوز کرنے کی کوشش میں ہیں۔

پاکستان نیوی کے ایک افسر نے اپنی شناخت مخفی رکھتے ہوئے بتایا کہ پی این ایس ذوالفقار پر قبضے کی ناکام کوشش کے سلسلے میں جاری محکمانہ انکوائری کے دوران بحریہ کے کم از کم آٹھ اہلکار حراست میں لیے جا چکے ہیں۔ ان گرفتار ہونے والوں میں کراچی سے تعلق رکھنے والے تین لیفٹیننٹ کمانڈر رینک کے افسران بھی ہیں، جن کو بلوچستان کے شہر کوئٹہ سے گرفتار کیا گیا کیونکہ یہ تینوں افسران ناکام حملے کے بعد افغانستان فرار ہونے کی کوشش میں تھے۔ بقیہ گرفتاریاں کراچی اور پشاور میں کی گئی ہیں۔