ہسپانوی ریاست کاتالونیا علیحدہ یورپی ملک بن سکتی ہے

اتوار کے روز اس نیم خود مختار ریاست کے رائے دہندگان یہ فیصلہ کریں گے کہ آیا مقامی حکومت کی باگ ڈور کاتالونیا کے صدر آرتھر ماس (Arthur Mas) کے ہاتھوں میں رہے گی۔

آرتھر ماس ہسپانوی وزیر اعظم ماریانو راخوئے کی پالیسیوں کے شدید ناقد ہیں اور کاتالونیا کی اسپین سے آزادی کے حق میں ہیں۔ کاتالونیا میں ایک عرصے سے آزادی کی تحریک چل رہی ہے اور اس کا شمار اسپین کے امیر ترین ریاستوں میں ہوتا ہے۔

رائے عامہ کے ابتدائی جائزوں کے مطابق ممکنہ طور پر ماس انتخابات جیتنے میں کامیاب رہیں گے اور دیگر علاقائی جماعتیں بھی آزادی کے حق میں ووٹ دے سکتی ہیں۔

اس ہسپانوی ریاست کی سست اقتصادی حالت اور بڑھتی ہوئی بے روزگاری کا ذمہ دار مرکزی حکومت کو ٹھہرایا جاتا ہے۔ کاتالونیا کے باشندوں میں یہ احساس بھی پایا جاتا ہے کہ اس ریاست کے زیادہ تر ٹیکس میڈرڈ کی مرکزی حکومت کے پاس چلے جاتے ہیں اور انہیں بعدازاں ملک بھر کے غریب علاقوں میں تقسیم کر دیا جاتا ہے۔

آرتھر ماس کی بھی رائے ایسی ہی ہے۔ ان کے مطابق آزادی کی صورت میں وہ بہتر کارگردگی کا مظاہرہ کر سکتے ہیں۔ آرتھر ماس کا کہنا ہے کہ وہ ٹیکسوں کے سلسلے میں مرکزی حکومت کے ساتھ مذاکرات کرنا چاہتے ہیں، ’’اگر ہم مرکزی حکومت کے ساتھ کسی بھی معاہدے تک پہنچنے میں ناکام رہتے ہیں تو ہماری لیے آزادی کے راستے کھلے ہیں‘‘۔

منتخب ہونے کی صورت میں ماس آزادی کے حق میں ایک ریفرنڈم کروانے کے عزم کا اظہار کر چکے ہیں جبکہ ہسپانوی وزیر اعظم ماریانو راخوئے نے آئینی طور پر اس ریفرنڈم کو روکنے کا کہا ہے۔ کاتالونیا کے باشندے ماس کے حق میں واضح حمایت ظاہر کر چکے ہیں۔ ستمبر میں بارسلونا میں ہونے والی ایک ریلی میں 1.5 ملین افراد شریک ہوئے تھے اور یہ ریلی کاتالونیا کی آزادی کے حق میں نکالی گئی تھی۔

اگر آرتھر ماس کی خواہش پوری ہو جاتی ہے تو کاتالونیا یورپی یونین کا 28 واں رکن ملک بن سکتا ہے۔ اس کی معیشت کا سائز تقریباﹰ پرتگال کی معیشت کے برابر ہے۔

کاتالونیا کی آبادی 7.6 ملین نفوس پر مشتمل ہے اور یوں آبادی کے لحاظ سے یہ آئرلینڈ، ناروے اور فن لینڈ سے آگے ہے جبکہ اس کا رقبہ بلیجیم کے رقبے کے برابر ہے۔ یہ اسپین کے شمال مشرقی حصے میں فرانس کے لیے سرحد کا کام دیتا ہے۔ کاتالونیا اسپین کی سترہ ریاستوں میں سے ایک ہے اور اس کا دارالحکومت بارسلونا ہے۔

ia/ah(Reuters,dpa,AFP)