አረፋ በድሬዳዋና በሐረር

በሀገሪቱ እየተስፋፋ ያለው የኮሮና ወረርሽኝ ስጋት እና በቅርቡ በአካባቢዎቹ የተከሰተው የፀጥታ መደፍረስ ጥላ ቢያጠላበትም በዓሉ ሰላማዊ በሆነ መልኩ መከበሩን የድሬደዋ እና ሀረር ነዋሪዎች እና አመራሮች ገለፁ ፡፡ 1441ኛው አረፋ በዓል በከተሞቹ በተካሄደ የስግደት ስነስርዓት ተከብሯል ፡፡በድሬደዋ ለ «DW» አስተያየት የሰጡት አቶ ሱልጣን በዓሉ በኮሮና መስፋፋት ሳቢያ እንደወትሮ በአንድ ቦታ ተሰባስቦ በመስገድ ባይከበርም ጥንቃቄን ተከትሎ በጥሩ ሁኔታ መከናወኑን ተናግረዋል፡፡የድሬደዋ አስተዳደር ምክትል ከንቲባ አቶ አህመድ መሀመድ ቡህ በበኩላቸው ህብረተሰቡ በዓሉን በመደጋገፍ እና በመተጋገዝ እንዲሁም በአስተዳደሩ ዘላቂ ሰላም እንዲሰፍን ፤ የኮሮና ችግር እንዲቀረፍ እና የተጀመረው የአረንጓዴ አሻራ ዕቅድ እንዲሳካ የበኩሉን እንዲወጣ ጠይቀዋል፡፡አቶ አቡበከር ሁሴን የተባሉ የሀረሪ ክልል ነዋሪ ለ«DW» በስልክ በሰጡት አስተያየት በዓሉ የሀይማኖት አባቶች በሰጡት መመርያ መሰረት መከበሩን ገልፀዋል፡፡
በሀረሪ ክልል ነዋሪ የሆኑት ዋና ኢንስፔክተር ረምዚ ሱልጣን በበኩላቸው በዓሉ የኮሮና ስርጭት እና የፀጥታ ችግሩ ጥላ ቢያጠላበትም በሰላም መከበሩን አስረድተዋል፡፡
የአረፋ በዓል በተለይ በድሬደዋ ከዋዜማው ጀምሮ በተለያዩ ርችቶች እና መብራቶች በደመቀ መልኩ እየተከበረ ይገኛል፡፡

መሳይ ተክሉ 

ኂሩት መለሰ
እሸቴ በቀለ