ክስየተሰረዘላቸዉ ተከሳሾች

የኢትዮጵያ መንግሥት የመሠረተባቸዉን ክስ የሠረዘላቸዉ ቴሌቪዥን ጣቢያዎች ኃላፊዎች የክሱ መሠረዘ በሥራ እና አሰራራቸዉ ላይ ብዙም ለዉጥ እንደማያመጣ አስታወቁ።የኢትዮጵያ ጠቅላይ አቃቤ ሕግ በኢትዮጵያ ሳተላይት ቴሌቪዥን (ESAT)፤ በኦሮሚያ ሚዲያ ኔትዎርክ (OMN)፤ በአርበኞች ግንቦት ሰባት ሊቀመንበር ዶክተር ብርሐኑ ነጋ እና በOMN ዋና ኃላፊ አቶ ጀዋር መሐመድ  ላይ መስርቶት የነበረዉን ክስ ማንሳቱን ትናንት አስታዉቋል።የቴሌቪዥን ጣባዎቹ ኃላፊዎች እንዳሉት ክሱ መነሳቱ ጥሩ ነዉ።ይሁንና የጣቢያዎቻቸዉን እና የጋዜጠኞቻቸዉን ነፃነት ለማስከበር ሌሎች ተጨማሪ እርምጃዎች መወሰድ አለባቸዉ።

ሰዎቹ የተከሰሱት «ሕገ-መንግሥቱን እና ሕገ-መንግሥታዊዉን ሥርዓት በኃይል የማስወገድ ሙከራ» በሚል የወንጀል ጭብጥ ነበር።ቴሌቪዥን ጣቢያዎቹ ደግሞ ግለሰቦቹ የሚያስተላልፉትን ጥሪ በመቀበል፤ለሽብር ቡድን ድጋፍ በማድረግ-----»እያለ ይቀጥላል-የክሱ ጭብት።ትናንት በአራቱም ላይ የተነሳዉ ክስ ተነሳ።አራቱም ከኢትዮጵያ ዉጪ ናቸዉ።

የኦሮሚያ ሚዲያ ኔትዎርክ (OMN) መሥራች እና ዋና ሥራ-አስኪያጅ ጀዋር መሐመድ እንደሚሉት  ክሱ መጀመሪያያም የሕዝብን ትግል ለማፈን ያለመ ነበር።የESAT ዋና አዘጋጅ ፋሲል የኔዓለም ደግሞ «አንቺዉ ታመጪዉ---አንቺዉ----»ዓይነት ይላል።«እነሱ ከሰሱን፤ እነሱዉ ሠረዙት።»ያም ሆኖ ጋዜጠኛ ፋሲል እንደሚለዉ የክሱ መነሳት ጥሩ ነዉ። በቂ ግን አይደለም።አቶ ጀዋር መሐመድም ተመሳሳዩን ነዉ የሚሉት።የክሱ መነሳት ቢያንስ ሐገር ዉስጥ ያሉ ተመልካቾች ጣቢያዉን ሳይፈሩና ሳይሸማቀቁ እንዲከታተሉ ይጠቅማል-ጅዋር እንደሚሉት።ጣቢያዉ ሐገር ዉስጥ  በነፃነት ለመሥራት ግን አሁንም ብዙ ሕግጋትና አሰራሮች መለወጥ አለባቸዉ።

                                           

ፋሲልም «አፋኝ» ያላቸዉ ሕጎች መነሳት አለባቸዉ ባይ ነዉ።የመንግሥት የመጨቆኛ ተቋማት አሠራርም መለወጥ ይገባቸዋል። ይሕ ሲሆን-ነዉ ኢሳት ከሐገር ዉስጥ በነፃነት መዘገብ የሚችለዉ።እነፋሲል ሕጎችን ከመሻር፤መሻሻል ወይም አሰራሮችን ከመቀየር በተጨማሪ ሌላ ያልተመለሰ ጥያቄም አላቸዉ።በኢሳት ላይ የተመሠረተዉ ክስ ቢነሳም ራሱ ፋሲል እና ቢያንስ አንድ ሌላ ባልደረባዉ ላይ በሌሉበት የተላለፈዉ ፍርድ እንዳለ ነዉ።

                                  

ዶክተር ብርሐኑ ነጋ፤ አቶ ጀዋር መሐመድ እና ሁለቱ ቴሌቪዥን ጣቢያዎች አሁን በተነሳላቸዉ የወንጀል ጭብጥ የተከሰሱት ከሁለት ዓመት በፊት ነበር።በነዶክተር መረራ ጉዲና መዝገብ።