በአዲስ አበባና ኦሮሚያ በኮሌራ የተያዘ ሰዉ ቁጥር መጨመረ

በኢትዮጵያ የተከሰተው የኮሌራ ወረርሽኝ እስከ ባለፈው ሳምንት ከተመዘገበው የ16 ሰዎች ሞት በላይ የሞት ጉዳት ባይከሰትም ስርጭቱ በአዲስ አበባ እና ኦሮሚያ ክልል መጨመሩን የኢትዮጵያ የሕብረተሰብ ጤና ኢንስቲትዩት ዛሬ በሰጠው መግለጫ አመልክቷል። በአዲስ አበባ በ9 ክፍለ ከተሞች፣ በኦሮሚያ፣ ትግራይና አማራ ክልሎች ተከስቷል የተባለው ኮሌራ በአንጻራዊነት በትግራይና አማራ ክልልሎች ካለፉት 10 ቀናት ወዲህ የተያዘ ሰው ሪፖርት አለመቅረቢና ስርጭቱ እየቀነሰ ነው ብሏል ተቋሙ። የኢቦላ በሽታ ወደ ኢትዮጵያ ባይገባም፣ ከአየር መንገድ ጋር ተያይዞ ችግሩ ሊከሰት የሚችልበት እድል በመኖሩ ከፍተኛ የጥንቃቄ ስራ እየተከናውነ መሆኑም በመግለጫው ተዳስሷል።

በሌላ በኩል በሃገሪቱ የተለያዩ አካባቢዎች የወባ፣ የኩፍኝ ወረርሽኝ በሰዎች ላይ፤ በቀላሉ ወደ ሰው የሚተላለፈው ጊኒ ዎርም ደግሞ በእንስሳት ላይ ተከስቷል ተብሏል። ከዚህ በተጨማሪም በኢትዮጵያ ያልተለመደ፣ ታይቶም የማይታወቅና መድሃኒትም ሆነ ክትባት የሌለው በትንኝ ንክሻ የሚተላለፍ «ችኩን ጉንያ» የተባለ ተላላፊ ወረርሽኝ በሶማሌ ክልል መከሰቱ ተነግሯል።  

ሰለሞን  ሙጬ

ማንተጋፍቶት ስለሺ
እሸቴ በቀለ