روسیه خواستار حفظ آرامش میان تاجیکستان و افغانستان شد
۱۴۰۰ مهر ۹, جمعه
خبرگزاری روسی "تاس" به نقل از وزارت خارجه روسیه نوشته است: «ما با نگرانی تنش‌های فزاینده را در روابط تاجیکستان و افغانستان در اظهارات شدید متقابل رهبری دو طرف مشاهده می‌کنیم.»
الکسی زایتسف، سخنگوی این وزارت گفته است که بر بنیاد معلومات خود طالبان، این گروه ده‌ها هزار نیروی ویژه را به ولایت تخار که با تاجیکستان هم مرز است، مستقر کرده است.
وزارت خارجه تاجیکستان و سخنگویان طالبان تا حال در این رابطه اظهار نظر نکرده اند.
امام علی رحمان، رئیس جمهور تاجیکستان از به رسمیت شناختن کابینه اعلام شده طالبان در کابل خودداری کرده و به آنچه که از جانب او در محاصره ولایت پنجشیر نقض حقوق بشر از سوی طالبان خوانده شده، نیز واکنش نشان داده است. ولایت پنجشیر محل تجمع نیروهای مخالف طالبان می باشد.
طالبان هم به نوبه خود به دوشنبه هشدار داده است که تاجیکستان در امور داخلی افغانستان مداخله نکند. ملا عبدالغنی برادر، معاون رئیس‌الوزرای طالبان در واکنش به اظهارات امام علی رحمان در مجمع عمومی ملل متحد، گفته است که تاجکیستان در امور داخلی افغانستان دخالت می‌کند.
تاجیکستان که میزبان یک پایگاه نظامی روسیه نیز است، در دو ولایت مرزی با افغانستان تمرینات نظامی را در روزهای چهارشنبه و پنجشنبه انجام داده است.
لوید آستین، وزیر دفاع ایالات متحده امریکا روز چهارشنبه در مورد پیلوت‌ها و سایر پرسونل نیروهای هوایی امنیتی افغانستان که توسط امریکا آموزش دیده و پس از سقوط کابل به دست طالبان به تاجیکستان فرار کرده اند، ابراز نگرانی کرده است.
در لحظات اخیر سقوط کابل، شماری از پرسونل نیروی هوایی افغانستان، طیاره های نظامی را به تاجیکستان و ازبکستان انتقال دادند و در آنجا بازداشت شدند.
aj-af(RTRE)