Baƙi 'yan ci rani na cikin matsala

Ranar 18 ga watan Disambar ko wace shekara rana ce da Majalisar Ɗinkin Duniya ta ware domin bikin ranar baƙi ta duniya da nufin yin nazari kan matsaloli da baki ke fuskanta, wanda ake gani a matsayin keta hakin bani Adama.

Kasashe da dama sun dauki wannan rana da muhimmanci inda suke gudanar da bukukuwa na musamman saboda irin gudumowar da baki suke bayar wa wajen bunkasa tattalain arzikin kasa da kuma harkokin yau da kullum.

Malam Muhammad Bello sarkin Arewa wani malami ne a sashin tarihi na jami'ar jihar Gombe, ya bayyana cewa bwannan ranar tana da matuƙar mahimmanci ga baƙi.

Bikin ranar wannan shekarar dai na zuwa a dai-dai lokacin da baki ke gamuwa da kalubale daga fuskoki da dama kama daga kora ko hana su wasu hakkoki ko da kuwa sun zauna tsawon lokaci a wannan wurare.

Sabanin kasashen da suka ci gaba inda ake rungumar baki tare da basu hakkoki na musamman saboda irin gudumowar da suke bayarwa, a Tarayyar Najeriya abin ba haka yake ba, don kuwa duk irin gudumowar da bako zai bayar ba zai samu wasu hakkoki ba duk tsawon zaman sa a wurin kuwa.

Malam Muhammad Bello ya bada misalai da irin yadda baki ke fama da matsaloli a Najeriya abinda yace yana haifar da koma baya.

Wannan matsala da baki ke fuskanta a wani lokaci kan zama tashin hakali, wani lokaci har da zubar da jini musamman a wasu sassa na Tarayyar Najeriya.

Yanzu haka a Tarayyar Najeriya wani dan sashi ba zai iya zuwa wani sashin kasar ya zauna ya mallaki gida ko shago ba saboda kawai shi ba dan asalin wannan yanki bane, abida ake gani yana ci gaba da haifar da wagegen gibi tsakanin shiyyoyin kasar.

Ko me haifar da wannan matsalar da a baya babu ita tambayar da na yiwa Malam Salihu Abdullahi kenan wani marubuci kuma mai fashin baki kan harkokin yau da kullum a tarayyar Najeriya. Inda yace matsala ce ta siyasa da shugabanni basu kai ga daukar matakin warwarewa ba.

Ana danganta karuwar wannan matsala da rashin aiwatar da dokoki da zasu tilasta magance wariya da ake nunawa baki inda masharhanta ke ganin matukar ba'a tsaurara dokokin ba, to kuwa baki za su ci gaba da zama cikin mawuyacin hali.

Mawallafi: Al-Amin Suleiman Muhammad

Edita:         Usman Shehu Usman