Datti mai zama ado a marinar kasar Moroko
Ga duk wanda ke son ganin inda ake rina fata to zai ziyarci birnin Fès don ya leka anguwar da ake rini. Ga masu yawon bude ido, tsaffin kalolin da ake rina fata da su abun sha'awa ne, hasali ma bakar wahalar yin rinin.
Ado da kayan al'ada
Shagon takalman fata wanda ke da farin jini ga masu yawon shakatawa a Moroko. A unguwanni da dama cikin tsohon birnin ana samun wuraren sayar da kayayyakin da aka dinka da fata. Misali, baya ga takalma ana samun jakunkuna da belt da dai sauransu wadanda aka yi su da fatu masu launuka daban-daban. A wannan birnin har yanzu ana yin jimar fata a gargajiyance.
Birni cikin birni
Daga kan baranda, masu yawon bude ido a birnin Fes na iya kallon marinar Chouara: A tsakiyar birnin ake gudanar da wannan sana'ar shekaru aru-aru. Suna aiki da kayakin asali wajen rina fatu. A cikin wadannan ramuka da aka gina, ake tsoma fatun kana ake fidda su a sake wanke su kafin kuma a sauya musu kala daga cikin ramukan nan. Hakan yakan dau shekara kafin fatar dabobin ta zama abun ado.
Tayar katakon da ke agazawa
Daya ma'aikacin na dora fatu bisa katanga yayin da dayan kuma ke dauraye su cikin ruwa. A Moroko masana'antar fatu tana jimar dubban miliyoyin fatu a kowace shekara. Marinar Chouara wanda ta musammance, akasarin jagororin masu yawon bude ido kan shawarci baki su ziyarci masana'antar da ke tsohuwar anguwar birnin Fes.
An yi musu gini mai kyau
Akan haka ramuka masu zurfi a zuba musu kalolin da ake bukata don rina fatun a marinar ta Chouara, kamar yadda ake gani a sama. Abin da ido ke sha'awar gani hanci kuwa na jin doyinsa. Musamman daga hodar da ake hada kalolin da ita. Don haka jagororin masu yawon bude ido, sukan baiwa mutum wani abin da zai shafa karkashin hancinsa ta yadda zai iya nunfashi da kyau.
Kafa ba takalma cikin fitsarin shanu
Ba tare da wata rigar kariya ba, wannan ma'aikacin haka yake ta jujjuyawa yana tsoma fatun cikin ruwa har sai kalarta ta koma fari. A Marinar Chouara har yanzu da kayakin gargajiya kamar su kashin baru da fitsarin shanu ake aiki da su. Sabanin marinar zamani da ke aiki da sinadaran da ke bata muhalli, inda sinadaran kan malala cikin magudanun ruwa da rijiyoyi.
Kenwowi a inda aka shanya fatu
Kamar wani juju, an dora fatun a tsohuwar katangar gidajen da ke kusa da marinar da ke Fès. Dole sai an shanya su, su bushe, kafin kuma a koma aiki a kansu. Yanzu wajen an ayyana shi a matsayin wurin tarihi na UNESCO.
Da hannu ake aikin
Rini, aiki ne da ke bukatar hannu. Masu aikin hannayensu kan kumbura don yawan tsoma su cikin fitsarin shanu da sauran tarkacen kayan rini. Bayan sa fatun cikin wadannan kayan sauya kala ana busar da su, kafin a sa musu hoda mai kaloli daban-daban. A marinar Chouara da ke Fès ana yin kalolin ne da kayan gargajiya irin su man Safran da galura da kuma jajayen fulawowi.
Aikin fenta fatu
Shin wannan zai kasance koriyar jakar hannu? ma'aikata biyu suke kokarin shinfida fatar da aka yiwa fenti don su busar da ita. Ga masu yawon bude ido, kallon aikin hannu na gargajiya abin sha'awa ne a gare su, amma fa ga masu gudanar da aikin da ke cike da datti, suna shan bakar wahala. Aikin ba shi da tsafta ko kadan.
Aiki iya rayuwa
Rayuwa kan aikin fata: Tun kimanin shekaru 60 wannan dan kasar ta Moroko ke aikin rina fata a marinar Chouara da ke birnin Fes. A yanzu yana da shekaru 80 shi ne ya fi kowa tsufa a masana'antar. 'Yan Moroko da yawa, kudin shigar aljihun su ya rataya ne ga aikin rini. Yayin da a irin wadannan biranen rashin aiki ga matasa ya kai kashi 30 cikin 100.