1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW
Talabijin kai tsaye
Shirye-shiryen DW HausaBidiyo
Siyasa

Staffan de Mistura zai ajiye aikinsa kan Siriya

Yusuf Bala Nayaya
October 17, 2018

Jakadan musamman daga Majalisar Dinkin Duniya don sulhunta rikicin Siriya Staffan de Mistura ya bayyana cewa zai ajiye mukaminsa bayan sama da shekara hudu yana wannan mukami.

https://p.dw.com/p/36j6y
Astana UN Syrien Sochy
Hoto: picture-alliance/dpa/M. Tereshchenko

Jami'in diflomasiyar wanda shekarunsa 71 a duniya zai ajiye mukamin ne a wata mai zuwa kamar yadda ya fada wa kwamitin sulhun Majaliar Dinkin Duniya a birnin New York.

De Mistura ya ce wannan ajiye mukamin nasa ya yi shi ne don wasu dalilai da suka shafe shi. Ya dai ba da muhimmiyar gudunmawa a kokarin ganin bangarorin da ke fada da juna a rikicin na Siriya da ya faro a shekarar 2011 sun koma kan teburi don warware matsalar da har kawo yanzu ta gagara. 

De Mistura ya ce zai yi amfani da makon da ya saura a wannan aiki wajen ganin an samar da kwamitin da zai yi aiki wajen ganin an samar da sabon kundin tsarin mulki ga kasar Siriya.