Kasafin kudin Nijer na 2013

A jamhuriyar Nijer majalisar dokokin kasar ta ka'da kuri'ar
amincewa da sabuwar dokar kasafin kudin kasar da kuri'a 81daga cikin 113. Sai dai 'yan majalisar dokokin na bangaren adawa guda 30 ne suka yi watsi da dokar musamman domin nuna rashin amincewarsu da matakin da gwamnatin kasar ta dauka na sayarwa fadar shugaban kasa jirgin sama a cikin wasu kudade da ta samu da sunan kyauta daga kamafanin AREVA kyautar da 'yan adawar suka ce da lauje a cikin nadi.

A jimlace dai kasafin kudin kasar na Niger na shekara mai kamawa ya tashi ne fiye da CFA miliyar dubu 339 akasin miliyar 1347 a bara. A cikin Kasafin kudin sabuwar shekarar dai na CEFA inda kashi 64 daga cikin 100 na wadannan kudade za a matso su ne a cikin gida. Sai dai 'yan majalisar dokokin kawancen jam'iyyun adawa na Kasar sun yi watsi da dokar ne wacce su ka kira lissafin duna da ko a
bara gwamnatin ba ta tattara kashi 50 daga cikin 100 na kudaden da
kasafin shekarar ya yi hasashen samu.

Sai dai maganar wasu kudade miliyar 17 na CFA da gwamnatin Niger din ta ce ta samo kyauta daga hannun kamfanin AREVA na Kasar Faransa da ke aikin hakar ma'adinin URANIUM a Niger kudaden da kuma gwamnatin ta ce za ta yi amfani da miliyar 7 don sayan jirgin soja daya domin tsaron kasa sannan miliyar 10 kuma ta sayarwa fadar shugaban kasa jirgin shiga shine ya haifar da babban sabanin da ya kai ga 'yan majalisar dokoki na bangaren adawa yin watsi da dokar.

Honourable Abdulkadiri Tijjani shine jagoran rukunin 'yan majalisar dokoki na bangaren 'yan adawa, wanda ya ce basu yi na'am da bukatar ba.
Illahirin 'yan majalisar dokoki 81 na bangaren adawa ne dai suka amince da tsarin dokar wacce su ka ce abar alfahri ce musamman ganin irin yanda ta tanadi cewa kashi 64 daga cikin 100 na kudin kasar na shekara za a matso su ne a nan cikin gida sabanin shekarun baya inda sama da kashi 60 daga cikin 100 na kudin kasar na dogaransu ne daga waje.

Da kuma ya ke mayar da martani kan batun sayan jiragen Honourable Zakari Ummaru bayyana korafin 'yan adawar yayi da cewa kyashi ne su ke dangane da abubuwan ci gaban kasar da gomnatin ta su ke nan tana yi a cikin kankanin wa'adi na kasa da shekaru biyu.

Da yammacin wannan Talatar (04. 12.12) ce majalisar dokokin Kasar ta Nijer ke gudanar da bikin rufe wanan zama na ta na nazarin kasafin kudin kasar na sabuwar shekara da ta share watanni ukku tana gudanarwa.

Mawallafi : Gazali Abdou Tasawa
Edita : Saleh Umar Saleh