Turkiyya ta kakkabe Kurdawa daga Afrin

A wani abin da ke zama babbar nasara ga mahukuntan na Ankara da dakarunsu suka dauki watanni biyu ana fafatawa da dakarun Kurdawa na YPG, dakarun kasar Turkiyya a karon farko sun kutsa kai yankin Afrin na kasar Siriya, ba tare da fuskantar wata babbar tirjiya ba inda suka dasa tutocin na Turkiyya a yankuna da dama na birnin.

Wannan dai na zuwa ne bayan da kasar ta Siriya ta shiga shekara ta takwas ta yakin basasa, yayin kuma da aka shiga gumurzun fada mai zafi a birnin na Afrin da yankin gabashin Ghouta a kusa da birnin Damascus.

An dai halaka daruruwan mutane yayin da dubbai suka kaurace wa muhallansu.