Ziyarar shugaban ƙasar Jamus a Bethlem
December 1, 2010A ƙarshen ziyarar da ya kai yankin Gabas ta Tsakiya, shugaban ƙasar Jamus Christian Wulff tare da babbar murya ya baiyana goyon bayansa ga tsarin samarwa Palesdinawa ƙasar kansu inda za su zauna kafaɗa da kafaɗa da Isra´ila. Samun zaman lafiya mai ɗorewa da zai gamsar da kowa da kowa, ba zai tabbata ba, sai ta hanyar samarwa Palesdinawa yantacciyar ƙasar da yantacciyar ƙasar Israila, inji shugaban na Jamus, lokacin jawabin haɗin gwiwa gaban manema labarai tare da shugaban Paledinawa, Mahmud Abbas a Bethlehem. Yace a shawarwarin siyasa da tattaunawar da yayi tun daga yan kwanakin baya ya gano cewa:
Zaman lafiya abu ne mai iya samuwa, idan har duka waɗanda abin ya shafa su ka nuna ƙwarin zuciya da niyyar cimma zaman lafiyar. Ina ganin wata kyakkyawar dama ce idan haɗin kai tsakanin waɗanda suke da hannu a wananan rikici ya zama a'ala kan ci gaba da fuskantar rikici a yankin, idan duka masu hannu a cikin sa, da suka yi fiye da shekaru 4000 suna faɗa da juna suka yanke shawarar fuskantar alƙibla guda, yadda kowa zai cimma burin sa.
Wulff ya yabawa aiyukan hukumomin Palesdinawa da ke samun taimakon kuɗi daga Jamus. Ƙasar dai ta na bada gudummuwa a fannin giggina aiyukan mulkin yankunan na Palesdinawa da hora da yan sanda da aiyukan shari'a da bada ilimi a makarantu, kamar yadda shugaban na Jamus ya nunar. Mahmud Abbas, wanda tun da farko ya yi marhabin da bakon daga Jamus tare da faratin soja a fadar sa dake Bethlehem, ya kwatanta Wulff a matsayin aboki na-gari, ya kuma godewa Jamus saboda taimakon da take baiwa hukumar sa.
Ya ce mu Palesdinawa muna godiya ga dukkanin ƙoƙarin da ku ke yi bisa ganin ci gaban Palesdinawan, muna kuma godiya ga dukkan Jamusawa, saboda duka irin abubuwan da suke yi mana.
To sai dai shugaban na Palesdinawa ya janye jikin sa daga karfin zuciyarda shugaban Jamus ya nuna, musmaman bisa lura da shawarwarin neman zaman lafiya tare da Israila wadanda yanzu watanni biyu kenan da aka dakatar dasu. Yace idan ba tareda Israila ta dakatarda shirin ta na giggina matsugunan Yahudawa a yankunan da ta mamaye ba, na yammacin kogin Jordan da gabashin birnin Kudus, ba zai yiwu a koma zauren shawarwarin ba.
A bisa amsa tambaya fdaga wani dan jarida na Palesdinawa, shugaba Christian Wulff ya maimaita alhakin dake wuyan Jamus na tabbatar da tsaron Isra´ila, to amma yace Jamus ta na da nauyi na musamman a kanta a game da Palesɗinawa. Shugaban na Jamus yayi kira ga dukkanin Jamusawa su kai ziyara a birnin Bethlehem, dake yankin dake karkashin mulkin Palesɗinawa a yanzu.
Mawallafi: Umaru Aliyu
Edita: Zainab Mohamed Abubakar