Безбедносни „дупки“ во конзулатот на САД во Бенгази

Телевизиите Си-Ен-Ен и Си-Би-Ес јавуваат за оставки на тројца високи по ранг дипломати задолжени за безбедноста на амбасадите во Министерството за надворешни работи. Освен тоа, функцијата ја напушта и шефот на службата за безбедност во американскиот Стејт департмент. Независната истражна комисија во извештајот наведува дека имало системски грешки на одговорните за безбедноста на дипломатската мисија во Бенгази. Американските дипломати морале да се потпрат на вооружените, но „недоволно обучени“ локални милиции.

Освен тоа, Стејт департментот ги игнорирал барањата на американската амбасада во Триполи за обезбедување поголема заштита - вака весникот „Њујорк тајмс“ цитира извадоци од извештајот на истрагата за случајот.

Во нападот на 11. септември (фото горе) беа убиени четворица американски дипломати, меѓу кои и американскиот амбасадор Крис Стивенс. Нападот дополнително беше оценет за терористички. Првично се тврдеше дека е резултат на спонтаните протести против видеото, произведено во САД, во кое се омаловажува пророкот Мохамед. За настаните во Бенгази и улогата на Министерството за надворешни работи денеска (20.12) изјава требаше да даде и министерката Хилари Клинтон, но таа по падот при кој доби потрес на мозокот, се наоѓа на боледување. Кон средината на јануари таа ја напушта функцијата. Таа инаку, даде налог за спроведување истрага за нападот во Бенгази.