1. Прескокни до содржината
  2. Прескокни до главната навигација
  3. Кон други страници на DW

Божиќно пиво за поубави празници

Каролин Мајер / Александар Методијев26 декември 2013

Пред Божиќ во баварските пиварници се работи под полна пареа. Тие произведуваат божиќно пиво. Тоа мора да биде подготвено без вештачки додатоци и да отстои осум недели.

https://p.dw.com/p/1Abr5
Фотографија: picture-alliance/dpa

Дали во Алгој, Швабија, Франконија или, пак, во Долна Баварија - исто е во сите региони на автономната покраина. Во декември има околу 500 различни божиќни, адвентски, празнични или зимски пива.

„Едни велат дека ова доаѓа од Норвешка, бидејќи Викинзите уште тогаш за рамноденица правеле специјално пиво. И кај нас е така, бидејќи секој прави нешто посебно на Божиќ - пекарите, месарите, а секако и пиварите“, вели експертот за пиво Клаус Артман.

Кој мисли дека Дедо Мраз става цимет, портокали и други состојки во баварското пиво, тој е во заблуда! Бидејќи тоа во Баварија е строго забрането. Не се ставаат вештачки состојки, туку само хмељ, квасец, вода и слад. Тоа се вари уште во септември, бидејќи пивото мора да отстои осум недели.

„Традиционално ги произведуваме нашите божиќни пива со различни сорти на слад и хмељ. Нив ги употребуваме веќе долго време. За да има малку повеќе вкус користиме карамелизиран слад, што на пивото му дава малку слаткаста нота. Притоа имаме и хмељ од сортата Тентанг-Тентанг, која е една стара земјоделска сорта. Рецептот и натаму е ист и е стар повеќе децении. Ако, на пример, ги погледнете нашите етикети, тие се рачно нацртани од страна на прадедото на нашиот шеф“, објаснува Франц Амбергер, од пиварницата „Флетцинген Број“.

Iserlohner Privatbrauerei
Фотографија: Iserlohner Privatbrauerei

Секое божиќо пиво си има свој сопствен изглед. И секое пиво секако дека има поинаков вкус, во зависност од тоа дали се работи за светло пиво или, пак, за црно пиво.

„Ова е малку потемно од нормалните светли пива. Бидејќи произведувачот на пивото размислувал да употреби посебен слад, односно малку повеќе слад, па така и ова е празнично пиво, кое има малку повеќе алкохол, односно меѓу 5,2 и 6 проценти. Кога се пие веднаш се забележува дека благиот слад се хармонизира со фината горчина на хмељот“, објаснува експерот за пиво Клаус Артман.

Од толку многу проценти и ирвасите ќе почнат да мрморат. Па тогаш - на здравје!