Борусија и Бајерн осамени на врвот

Бајерн Минхен се избори за позицијата главен конкурент на Борусија Дортмунд во борбата за титулата по неделната победа над Шалке од 2:0. Огромниот притисок врз играчите по поразот во Лигата на Шампионите од швајцарскиот Базел, резултираше со жестока офанзива на баварските ѕвезди која Шалке немаше сили да ја сопре. Јунак на мечот беше Франк Рибери со два постигнати гола.

Актуелниот првак Борусија пред своите навивачи го совлада Хановер со 3:1 и ја задржа предноста на врвот од четири бода. Левандовски на двапати и Перишиќ се погрижија Борусија да остане непоразена и во 17. меч едноподруго.

Менхенгладбах и Вердер разочараа

Борусија Менхенгладбах одигра една од полошите партии сезонава во ремито 1:1 на домашен терен против Хамбургер. Ханке го доведе својот тим во водство, а Арслан израмни за гостите од Хамбург. Менхенгладбах го задржа третото место на табелата со пет бода заостанување зад Дортмунд.

Вердер во Бремен доживеја непријатно изненадување во дуелот против кандидатот за испаѓање Нирнберг. Играчите на Вердер прокоцкаа голем број шанси за гол и на крајот останаа со празни раце откако Есвајн го постигна единствениот погодок на мечот.

Келн го доживеја шестиот пораз на последните седум меча, овојпат пред домашните навивачи во рајнското дерби против Леверкузен. Бајер беше надмоќен и победи со 2:0, а ѕвездата на Келн, Лукас Подолски по мечот застана во одбрана на тренерот Стале Солбакен.

„Тој беше доведен за да изгради нешто ново, и треба да се остави да го стори тоа“, рече Подолски. Бајер со трите бода се искачи на петтото место, додека Келн и дефинитивно падна меѓу тимовите кои се борат за опстанок.

Камбекот на Рехагел- дебакл

Не мина добро тренерскиот камбек на славниот Ото Рехагел на клупата на берлинска Херта. Аугсбург славеше пред своите навивачи со 3:0 и за првпат сезонава не е директно во зоната за испаѓање. За Херта ова беше шести пораз едноподруго во лигата.

Маркус Бабел, пак, ја забележа првата победа во третиот меч на клупата на Хофенхајм. Повторно му се посреќи на гостувањето кај Волфсбург каде славеше и есеноска, но со тимот на Херта. Со победата од 2:1 Хофенхајм се искачи на 9. место на табелата, додека Волфсбург е на 13-то.

Штутгарт забележа чиста победа над Фрајбург од 4:1 и се зацврсти на средината на табелата, иако со последните резултати беше загрозена позицијата на тренерот Бруно Лабадиа. Фрајбург го презеде „фенерот“ на табелата и ќе води тешка битка за опстанок. Друштво на дното му прави тимот на Кајзерслаутерн кој забележа тежок пораз, 13-ти по ред, од 4:0 на гостувањето кај Мајнц. Според формата во последните мечеви, Мајнц, за кого не настапи македонскиот репрезентативец Николче Новески поради повреда, не мора да стравува за опстанокот.

Автор: Арнулф Бечер/Б. Георгиевски

Редактор: Жана Ацеска