Велика Британија: Предвремени избори како лотарија

Ќе излезе ли Тереза Меј посилна од предвремените избори? Премиерката на Велика Британија би можеле да ја чекаат и лоши изненадувања, сметаат некои Британци.

Иако можеби вчерашната најава најнапред изненади, сепак откако Велика Британија на 23 јуни минатата година гласаше за Брегзит, Дејвид Камерон даде оставка, а Тереза Меј стана премиерка, можноста за предвремени избори лебдеше во воздух. Меј, наспроти тоа, постојано негираше дека планира нови избори.

Во септември минатата година таа потенцираше дека нема да има нови избори: „Потребно ни е време и стабилност, за да се справиме со проблемите на земјата. Изборите треба да се одржат во 2020 година“. И до пред само еден месец Даунинг стрит 10 негираше дека размислува за предвремени избори.

Значи што се промени? Во изминатите месеци Меј ја најави нејзината визија за тврд Брегзит, во кој Велика Британија комплетно ќе се повлече од ЕУ. При најавата за предвремените избори на 8 јуни, таа јасно укажа дека сака да го зајакне мандатот за нејзините намери. „ Ова е момент од енормно национално значење тука во Велика Британија. Во Вестминстер мора да владее единство“. Нејзе ѝ е потребно единство во парламентот, кое во моментов го нема.

Тереза Меј

Бројките упатуваат на тоа дека Меј нејзиното тесно парламентарно мнозинство би можела значително да го зголеми со нови избори, бидејќи Лабуристичката партија е раскината од внатрешни конфликти. Ако се земе просекот од сите анкети, конзервативците на Меј актуелно имаат 42 насто поддршка кај граѓаните, а Лабуристичката партија само 27 проценти. Тоа би било доволно за комотно мнозинство за Меј.

Циничен потег?

Реакциите на најавата на Меј многу се разликуваат. „Брилијантна тактика од страна на премиерката“, вели Метју Брук, инженер од Лидс кој гласал за Брегзит. „Лабуристичката партија не ниту веродостојна опозиција, сите приврзеници на Брегзит - многу од нив и самите гласачи на лабуристите - ќе излезат на избори, ќе гласаат и ќе ја покажат својата согласност“.

Референдумот за Брегзит во јуни минатата година откри длабоки јазови во британската јавност. Некои сега стравуваат дека изборите ќе бидат повторување на референдумот - со слични потреси за општеството. „Ова е циничен потег на Меј, која сосема јасно сака да го зголеми владиното мнозинство, за да може без отпори да го протурка нејзиниот тврд и економски катастрофален курс за Брегзит“, вели Зои Лоренс, која работи за хуманитарна организација во Лондон. „Таа говори за национални интереси, но всушност важни ѝ се само интересите на конзервативците. Како поинаку можеме да ги оправдаме трошоците и раздразнетоста, кои доаѓаат со изборите, толку кратко по референдумот?

И Питер Френклин, писател од Белфаст, гледа бројни ризици: „Се наоѓаме пред политичка криза во Северна Ирска, која во најголема мерка е игнорирана од страна на политичарите во Вестминстер. Шкотите повторно бараат независност“, вели Френклин. „Искрено кажано, изгледа неодговорно, во вакви околности да се одржуваат избори. Што се случи со неопходноста за стабилност?“ 

Игра на среќа

Се разбира новите избори претставуваат и коцка за Меј: иако Лабуристичката партија стои лошо во анкетите, на многу нејзини пратеници седиштата во парламентот им се сигурни. Покрај тоа мислењата за Брегзит се поделени и во редовите на конзервативците. Така што парламентарното мнозинство може на крајот да испадне далеку помало отколку што се надева Меј. Либералдемократите, кои во моментов имаат само осум пратеници, покрај тоа со анти-Брегзит платформа се борат за нови избори и се обврзаа да спроведат втор референдум. Шефот на партијата Тим Ферон веднаш издаде соопштение во кое либералдемократите се позиционираат како анти-Брегзит опција: „Ако сакаш да избегнеш тврд катастрофален Брегзит, ако сакаш да ја задржиш Велика Британија во внатрешниот пазар на ЕУ, ако сакаш Велика Британија која е отворена, толерантна и обединета - тогаш ова е твојата шанса“, се вели во прогласот.

Затоа некои гласачи за опцијата за останување на Велика Британија во ЕУ на референдумот во минатата година сега во најновиот развој на настаните гледаат шанса: „Можеви ќе успееме некои пратеници да ги замениме со кандидати кои ќе сторат сѐ за да се остане во ЕУ“, вели Ајша Хазариа службеничка од Единбург. „Се разбира нема да победиме, но барем тоа ќе биде можност одново да се отвори дебатата. Со задоволство би сакала да видам анти-Брегзит алијанси независно од партиското членство“, вели Хазариа.

Збогум Британија, ние си заминуваме...

Водафон

Втората по големина компанија за мобилна телефонија во светот ја разгледува опцијата да го премести своето седиште надвор од Британија по Брегзит. Диселдорф би можел да биде една од опциите за новото седиште на компанијата. Водафон веќе е присутна во германскиот град каде вработува околу 5.000 луѓе, исто така, Германија е најголемиот пазар на компанијата.

Збогум Британија, ние си заминуваме...

Рајанер

Најголемата авиокомпанија за ефтини летови во Европа официјално е регистрирана во Ирска, но голем дел од нејзината флота е лоцирана во Британија. Но, тоа може наскоро да се смени – од Рајанер најавуваат дека своите летала повеќе нема да ги стационираат таму.

Збогум Британија, ние си заминуваме...

Изиџет

Втората по големина авиокомпанија за ефтини летови во Европа е базирана во Лондон, но, до кога? „За тоа ќе видиме“, изјави извршната директорка на компнанијата Керолин Мек Кол во телевизиско интервју. Изиџет е една од најпрофитабилните компании во Европа.

Збогум Британија, ние си заминуваме...

Вирџин

Ричард Бренсон е еден од најпознатите бизнис личности во Британија. За Брегзит тој изјави: „Британија е насочена кон економска катастрофа“. Неговиот конгломерат изгуби една третина од вредноста по референдумот во земјата. Бренсон ја повика владата да организира втор референдум.

Збогум Британија, ние си заминуваме...

ЏејПиМорган Чејс

Најголемата банка во САД вработува околу 16.000 луѓе во Лондон. Но, менаџментот сега разгледува повеќе можности да премести дел од операциите надвор од Британија. Извршниот директор на банката, Џејми Димон, пред референдумот изјави дека помеѓу 1.000 и 4.000 работни места може да бидат преместени надвор од Лондон доколку се случи Брегзит.

Збогум Британија, ние си заминуваме...

Виза

Оваа компанија ќе нема голем избор освен да го намали бројот и обемот на активностите во Британија, што ќе доведе до кратење на стотици работни места. Според регулативата на ЕУ, компанијата мора да одржува центар за податоци во земја на ЕУ. Што практично ќе значи крај за податочниот центар на компанијата во Лондон.

Збогум Британија, ние си заминуваме...

Форд

Од Форд неколку пати изјавија дека Британија е „клучен пазар“ за компанијата во Европа. Фабриката на Форд во Дагенхам произведува делови и мотори за филијалите на компанијата во Германија. По одлуката за напуштање на ЕУ, од Форд изјавија дека компанијата ќе ги преземе сите потребни мерки да остане конкурентна на пазарот.

Збогум Британија, ние си заминуваме...

Јагуар Ленд Ровер

Сепак, сите компании не се песимисти. „Ние сме Британци и стоиме зад Британија“, изјави Едријан Халмарк, одговорен за стратегии во Јагуар Ленд Ровер. Нема промени во нашите бизнис планови, уверува Халмарк за периодот од следните две години во кои Британија со сигурност ќе остане дел од ЕУ.

Следете нѐ