Вестервеле: Останувањето на Грција во еврозоната зависи од неа самата

Германската влада смета дека суштински отстапки во реформскиот пакет за Грција не се возможни, изјави шефот на германската дипломатија Гидо Вестервеле по средбата со грчкиот министер за надворешни работи во Берлин.

„Германија сака Грција да остане во еврозоната и ќе работи во таа насока. Но, клучот за тоа е кај Атина“, му порачал Вестервеле на Димитрис Аврамопулос.

Грчкиот министер, пак, истакнал дека владата во Атина има намера да ги исполни меѓународните обврски. Средбата на двајцата министри послужи како подготовка за посетата на грчкиот премиер Андонис Самарас на Берлин. Тој в петок треба да се сретне со германската канцеларка Ангела Меркел. Непосредно пред тоа во германската престолнина треба да престојува францускиот претседател Франсоа Оланд. Портпаролот на германската влада Штефен Зајберт веќе предупреди за преголеми очекувања од двете средби.

„Не треба да се смета на тоа дека на нив ќе бидат определени големи цели, ниту дека ќе бидат донесени значајни одлуки“, истакна Зајберт.

Грчкиот министер за финансии Јанис Стурнарас во интервју за весникот „То Вима“, пак, предупреди дека на Грција и’ се заканува исклучување од еврозоната, ако не ги намали расходите како што бараат меѓународните кредитори. Тој информираше дека наместо планираните 11,5 милијарди, расходите треба да бидат намалени за 13,5 милијарди евра до 2014 година. Според Стурнарас исклучувањето од еврозоната би било катастрофа за земјата.

„Не сакам да ме обесат на Синтагма. Ние треба да преживееме, да се задржиме под чадорот на еврото, затоа што тоа ќе не’ заштити од сиромаштија каква што досега не сме почувствувале“, рече Стурнарас.

Евентуалниот грчки излез од еврозоната може да се менаџира, но ќе биде многу скап и ќе резултира со зголемена невработеност, оцени германскиот член на бордот на Европската централна банка Јорг Асмусен во интервју за весникот Франкфуртер Рундшау.