Вилдерс сака Холандија да истапи од ЕУ

Во Холандија претстојат предвремени избори, бидејќи холандскиот десен популист Герд Вилдерс ја откажа поддршката за малцинскиот кабинет на конзервативите либерали и христијанските демократи.

Толку јасно и недвосмислено Вилдерс со неговата Партија на слободата досега нема побарано истапување на својата земја од европската заедница. Надвор од еврото, надвор од целата Европска унија бара сега Вилдерс и во изборниот спот кој делува борбено, појаснува: „Еврото не е пари, тоа не‘ чини пари. Европската унија е несреќа за Холандија".

Вилдерс особено се противи на натамошни плаќања во европскиот спасувачки чадор. Затоа во април годинава ја откажа поддршката за малцинскиот кабинет од либералите и христијанските демократи и со еден потег ја испрати владата на нови избори. На неговите сограѓани им појаснува: „Мораме да плаќаме милијарди за Грција. Сега на Шпанија и‘ е потребна поддршка од нас, како и на Португалија и на Кипар, можеби наскоро и на Италија, пропаднати банки, банкротирани земји, а вие морате да плаќате“.

Според последните анкети на реномираниот холандски институт за истражување на јавното мислење „Маурис де Хонд“ од неделава, десните популисти како и досега би биле трета политичка сила во парламентот во Ден Хаг во кој се застапени десет партии, зад конзервативните либерали на премиерот Марк Руте и социјалистите. Социјалистите досега во Холандија никогаш немаат поставено премиер. Љубезниот наставник и шеф на социјалистите Емил Ремер, би можел да биде првиот. Руте и Ремер во моментов би ги имале зад себе речиси половината од 150 пратенички мандати во парламентот. Но дека нивните две партии ќе формираат коалиција е неверојатно, повеќе може да се исклучи таква можност.

Непријателскиот тон кон Европа на Герд Вилдерс меѓутоа не наидува на големо одобрување кај неговите сограѓани. Според анкетите, тој губи гласови. Малку, но континуирано. Неговиот главен проблем е друг: никој не сака да коалицира со Моцарт, како што го нарекуваат поради неговата фризура. На конзервативците им е преку глава, а левичарите во секој случај и натаму ќе седат во опозициските клупи, отколку да коалицираат со Вилдерс.