ВМРО-ДПМНЕ во офанзива за останување на власт

Продолжува стратегијата на ВМРО-ДПМНЕ за „вистинско информирање“, лобирање, блокирање и сопствено факторизирање, со која ќе го дочекаат и претседателот на Европскиот совет, Туск. СДСМ чека да заврши собранискиот маратон

Преку блокирање на работата на Собранието со идентични реплики и процедурални забелешки кои ситуацијата ја водат кон апсурд и безизлез, раководството на ВМРО-ДПМНЕ се обидува да изнуди нови политички разговори за излез од кризата, во кои тие би биле клучен фактор, велат за ДВ извори упатени во стратегијата на партијата на Груевски. За таа цел, партиски функционери подолг период биле во интензивна комуникација со претставници на сестрински партии, со цел да лобираат за претставување на „единствената вистина“ за состојбата во Македонија и да влијаат во промена на ставовите по прашањето кој ја генерира кризата во Македонија. Една од платформите за реализација на таквите намери беше и Конгресот на Европската народна партија во Малта, на која, како што соопшти ВМРО-ДПМНЕ, Груевски имал повеќе билатерални средби.    

„Имавме можност да се видиме со повеќе политичари од Европа, со луѓе со кои е добро да се зборува за Македонија, за стратегиските интереси на државата, за нашите интеграции, како и за домашните политички случувања во кои сме донесени поради сѐ она што СДСМ го направи во изминатиот период. Ова беше добра можност да се образложат состојбите, да се дадат точни информации и да се побара понатаму поддршка за Македонија за излез од кризата“, изјави Груевски.

Според нашите извори, „членките на ЕПП подолг период ја слушаат истата приказна, со исти објаснувања за неточни или нецелосни информации во однос на состојбите во Македонија, но таа верзија (на ВМРО-ДПМНЕ -н.з) со мали исклучоци (Орбан-н.з), тешко поминува, бидејќи реалноста не зависи ниту од нивната, ниту од други партиски интерпретации, туку од конкретните резултати, состојби и факти во реалноста“. Притоа потенцираат дека „станува иритирачка упорноста да се направи конверзија на црното во бело, наместо да се покаже волја за соочување со проблемите, одговорност и етика“.

Од платформа до Голема Албанија

Во пресрет на доаѓањето на претседателот на Европскиот совет Доналд Туск во Македонија,стратегијата на ВМРО-ДПМНЕ не се менува.„Дебатата“ во парламентот продолжува со ист интензитет на трошење на времето, кое според проценките дневно „јаде“ над 20.000 евра, а закочени се голем број процеси кои не може да бидат спроведени во мандат на техничка влада. Тема број еден и натаму е т.н. Тиранска платформа, која стана пропагандистички меѓник меѓу „бранителите и продавачите на државата“ и основа за мерење на „нескршливоста“ на претседателот Иванов, но и наратив што ги полни медиумите во соседството. Иван Стоилковиќ, претседател на Демократската партија на Србите во Македонија, која е дел од коалицијата предводена од ВМРО-ДПМНЕ, во интервју за белградска „Политика“ под наслов „Брисел нема да го скрши Ѓорге Иванов“, вели дека „интерес на 'западните пријатели' е да завршат работа со Албанците, да го решат проблемот околу името на Македонија и да ја протуркаат земјата во НАТО, а воопшто не им е важно како ќе им биде на граѓаните“. Тој потенцира дека во сегашната политичка криза во Македонији најважен интерес е да не заживее „Тиранската платформа“, бидејќи таа практично значи почеток на создавање „Голема Албанија“.

„Оваа платформа, донесена во туѓа земја, ги осудува и Македонците и Србите за наводен геноцид на Албанците во периодот од 1912. до 1956. година“, изјавил Стоилковиќ, додавајќи дека ако тоа помине, српскиот народ во Македонија ќе се најде во невозможна положба, а во тешка позиција ќе ја доведе и Србија.

Никола Груевски и Ѓорге Иванов

Македонскиот „Додик“

Во друг текст во истиот весник, Иванов е портретиран како „Претседател со 'рбет“, политичар кој „упорно одбива мандатот за формирање влада да го даде на лидерот на СДСМ кој обезбедил парламентарно мнозинство од 67 од вкупно 120 мандати (...) па Брисел размислува и да воведе санкции за сите кои го кочат формирањето на новата македонска влада“.

„Ако дојде до тоа, прв на таа црна листа на ЕУ би можел да се најде претседателот Ѓорге Иванов“, пишува „Политика“.

„Не вредеше ни доаѓањето на Федерика Могерини во Македонија, ниту јавниот притисок на генералниот секретар на НАТО, Јенс Столтенберг и американскиот амбасадор во Скопје, Џес Бејли. Наместо да попушти, Иванов побара од меѓународната заедница да ја осуди платформата донесена под диригентската палка на албанскот премиер Еди Рама“, се оценува во текстот. Притоа се потсетува дека поради одбивањето да се сретне со Јоханес Хан и тројца европарламентарци во Скопје, Иванов во медиумите го заработил епитетот - неуценет претседател.

„Овој експерт за цивилно општество, некогашен член на последното претседателство на Сојузот на социјалистичката младина на Југославија, кога по втор пат е изабран за претседател во 2014 година, му испрати писмо на Барак Обама дека целта на Македоније е влез во ЕУ и НАТО. Три години подоцна, на првиот човек на државата која пука по националните шавови, а државите-основачи ЕУ сѐ уште не ја признаваат под уставното име, му се заканува судбината на Милорад Додик - да биде уште еден балкански претседател под санкциите на Запад“, објави „Политика“.

Сезона на протести: Од Тврдокорни до „За заедничка Македонија“

Груевски и „народот“

„Сакам да им порачам на сите граѓани дека ако сметаат и ако планираат со седење дома и гледање телевизија дека некој друг ќе им ја одбрани државата, длабоко се во заблуда. Тоа народот може да го докаже на дело и да покаже поинакво однесување“, изјави Никола Груевски во интервјуто за телевизијата Сител на 26 февруари. Веќе следниот ден се одржа првиот протест за одбрана на татковината...

Сезона на протести: Од Тврдокорни до „За заедничка Македонија“

„За заедничка Македонија“

Првиот протестен марш беше оддржан на 27 февруари. Граѓани со транспаренти на кои беа испишани пораки за одбрана на Македонија се собраа пред Владата од каде го започнаа маршот кон Собранието. Предводници маршот се Богдан Илиевски, Борис Дамовски и Игор Дурловски здружени во иницијативата „За заедничка Македонија“.

Сезона на протести: Од Тврдокорни до „За заедничка Македонија“

Тврдокорни

Во првите неколку денови од протестите, пораката за „Заедничка Македонија“ беше во втор план, а настапот на демонстрантите беше одбележан со транспаренти кои го потенцираа нивниот надпартизам или се промовираше Македонското патриотско здружение- „Тврдокорни“. Мотото на почетокот беше „Македонски марш- завет за Македонија“.

Сезона на протести: Од Тврдокорни до „За заедничка Македонија“

Црвени линии

Барањата на демонстрантите и иницијативата „За заедничка Македонија“ се безусловно отфрлање на т.н. Тиранска платформа и зачувување на унитарноста на Македонија. Тие исто така се против двојазична и двонационална Македонија, против промена на знамето, химната и државниот грб.

Сезона на протести: Од Тврдокорни до „За заедничка Македонија“

„Чиста Македонија“

Организаторите на протестите порачаа дека нивните барања се базирани на вредностите на претходните три Илиндени - соживот, почит и толеранција. „Сакаме да живееме во оваа земја заеднички со сите останати народи – како што сме живееле до сега, да продолжиме во иднина“ изјави Богдан Илиевски - иако на првиот ден од протестите се скандираше за „чиста Македонија“ и против „клетите Шиптари“.

Сезона на протести: Од Тврдокорни до „За заедничка Македонија“

Стари пораки

Политичките пораки на транспарентите кои можат да се видат на протестите имаат препознатлива симболика. На нив се испишани пораки против мешањето на ЕУ во кризата, против Џорџ Сорос и амбасадорот на САД во Македонија, Џес Бејли - додека истовремено се изразува поддршка за Доналд Трамп. Оваа констелација на пораки во голем дел се поклопува со реториката на власта во пред и пост изборниот период.

Сезона на протести: Од Тврдокорни до „За заедничка Македонија“

Јоханес Хан „сардисан“

При посетата на Скопје на 21 март, Јоханес Хан беше пречекан со протест пред седиштето на ЕУ од демонстрантите на „За Заедничка Македонија” и дел од вработените во Трансмет. Граѓаните се собраа пред канцелариите на ЕУ, а вработените во компанијата на Сеад Кочан со камиони го блокираа булеварот. Хан мораше да излезе од задната врата под полициски надзор, без да биде забележан од демонстрантите.

Сезона на протести: Од Тврдокорни до „За заедничка Македонија“

Медиумски (не)пријатели

„Медиумите под отстрел“ - гласи еден од транспарентите на протестите, алудирајќи на случајот на Сеад Кочан, исто така сопственик на телевизија НОВА. Но, се чини дека токму новинарите кои известуваат од протестите се најдоа на мета на демонстрантите. На вториот ден од протестите беа нападнати двајца новинари кои со повреди завршија во ургентниот центар.

Изолиран политичар

Опозицискиот СДСМ и партиите кои го сочинуваат парламентарно мнозинство засега немаат друго решение, освен да чекаат да заврши маратонската „дебата“ во Собранието. Од таму не прогнозираат дали посетата на Туск ќе може да ги забрза процесите. Се  повикуваат на пораките во Резолуцијата усвоена од Европската народна партија, која ја сметаат како „уште еден доказ дека Груевски е изолиран политичар која ја изгуби довербата од сите значајни меѓународни политички субјекти“.

„Пораките во Резолуцијата го осудуваат сè она што Груевски ѝ го прави на Македонија. Европската народна партија јасно стави до знаење дека не толерира корумпирани политичари и корупциски скандали, дека ги осудува провокациите и агресивното однесување кое претставува закана за мирот и стабилноста и истовремено повика на воздржаност од етнички провокации. И заклучоците на германскиот Бундестаг - дека мора да се почитува мнозинството и дека нови избори не се опција, се јасни пораки до Груевски и Иванов да престанат со непресметливото однесување кое ги загрозува државните и интересите на граѓаните“, велат од СДСМ.

Денеска следува петто продолжение на конститутивната седница на Собранието. Еден од пратениците врз основа на стенограмите преброил дека само првиот ден „Тиранската платформа“ била спомната дури 132 пати, а ако продолжи истиот тренд, денеска ќе надмине 600. 


Следете нѐ