Во потрага по среќа

Според последните податоци на „Еуростат“, Македонија има брито домашен производ по глава на жител кој е за цели 70% понизок од просекот во ЕУ. Земјата има помал БДП и од Хрватска и Турција, двете земји кандидати за членство во Унијата. Живеењето во Македонија не е лесно, па затоа се’ поголем е бројот на луѓе коишто среќата си ја бараат во некоја друга побогата држава. Во некои региони ситуацијата со иселувањето е критична. Дебар е еден од најпечалбарските краеви во Македонија.

Според некои статистики во дебарскиот крај бројот на жителите преполовен, во однос на деведесеттите години. Масовниот бран иселувања, кој никако да запре, околу шест илјади дебрани - кои така се нарекуваат без оглед дали се од Дебар, од Жупа или од Река, ги однесе во Италија. Неколку илјади се во другите европски земји, а цел еден Дебар во САД. „И повеќе од еден Дебар“, вели претседателот на татковинското друштво „Дибра“, Ибрахим Колари.

Америка е една од најомилените дестинации

Во овој крај нема семејство кое нема свој близок надвор од границите на Македонија. Со години таму се и цели фамилии.За оние кои останле тука на радоста и нема крај кога ќе добијат виза и ќе може да ги видат најблиските. На почетокот на 2008 повеќе од четористотини дебрани поднеле документи за добивање виза преку американската лотарија, а среќата, како што самите велат, им се насмевнала на 30 од нив. Тие сега веќе се таму. Повеќето се фамилијарни лица што ќе рече дека заминаа не триесет туку најмалку трипати повеќе. А оние кои заминуваат за евопските земји, пред се Италија, и не може да се бројат. За сите нив, каде и да се, заедничка им е носталгијата и желбата да дојдат барем за малку, да стапнат на родната грутка, зашто како што вели Зулфо Незировски, дома си е дома.

А како и да не тагуваат, напуштаат еден од најубавите краеви во Македонија. Место каде се живее покрај жуборењето на прекрасната река Радика и шумлењето на Бистра, Кораб, Крчин и Стогово.