Германија во шок, Берлин на удар на тероризмот!?

За сите нас би била тешко поднослива мислата дека извршител на едно вакво ужасно дело е човек кој во Германија барал заштита и азил, изјави Меркел. Таа вели дека повеќе не може да се исклучи можноста од тероризам.

Германската канцеларка Ангела Меркел изрази голема доверба во истрагата која треба да го разјасни „ужасното и несфатливо злосторство“, кое длабоко ја потресло и мора да биде казнето, според острината на германските закони. Меркел во овие мигови во мислите е со настраданите и ранетите.

„Целата земја е обединета во жалоста“, истакнува Меркел. „Според сегашните сознанија, станува збор за терористички напад. Знам дека потврдата на такво нешто за сите нас би била тешко поднослива, дека такво нешто извршил човек кој во Германија молел за заштита и азил“, истакнува Меркел.

  Осомничениот возач кој со товарен камион синоќа влета во божиќен пазар во Берлин и усмрти 12 лица, а повреди 48, според најновите сознанија е 23 годишен маж од Пакистан, кој во Германија стигнал како бегалец. Тој на крајот на декември 2015 година преку Пасау влегол во Германија, а претходно се движел по т.н. Балканска бегалска рута. Според медиумите, уапсениот осомничен живеел во бегалски дом сместен на поранешниот берлински аеродром Темпелхоф. Тој користел повеќе имиња и на полицијата веќе ѝ бил познат по поситни деликти. Радио РББ јавува дека утрово е извршен претрес на бегалското сместувалиште, но не е познато за извршени други апсења. Осомничениот добил право на привремен престој во земјата во јуни годинава. 

Now live
00:44 минути
Сите содржини | 20.12.2016

Хорор на божикен панаѓур во Берлин

Истрагата ја презеде Сојузното јавно обвинителство од Карлсруе, надлежно за државна заштита. Камионот со полски регистерски таблички според полицијата околу 20 часот влетал на просторот на божиќниот пазар во населбата Шарлотенбург, навлегувајќи 50 до 80 метри и уништувајќи повеќе куќички-штандови. На совозачкото седиште на камионот е најден уште еден човек, Полјак, кој бил мртов. Полицијата соопшти дека човекот загинал од огнено оружје. Весникот „Ди велт“ пишува дека во фаќањето на осомничениот возач, кој по влетувањето на камионот во божиќниот пазар побегнал, помогнал еден сведок на настанот. Тој на одредено растојание го следел возачот на камионот и преку телефон постојано давал податоци на полицијата за движењето на осомничениот.  Полициско патролно возило го пресретнало на два километри од божиќниот пазар. 

Камионот инаку припаѓа на полска шпедитерска фирма, чиј сопственик Ариел Зуравски за полската ТВН24 изјави дека по 16 часот загубил контакт со возачот, инаку негов роднина. „За него ставам рака в оган, дека не е атентатор, „мора нешто да му се случило", вели шпедитерот.

Полицијата претпоставува дека камионот, кој бил натоварен со челични конструкции и требало да биде истоварен во Берлин, бил украден.

Германскиот претседател Јоахим Гаук изјави дека е шокиран од настанот. „Ова е тешка ноќ за Берлин и за нашата земја, која мене како и многумина други многу не потресе. Сочуствувам со жртвите, со нивните семејства, како и со сите луѓе кои стравуваат за животите на своите блиски и пријатели".

Хронологија: терористички заговори во Германија

Лајпциг, октомври 2016

Полицијата во Лајпциг го уапси 22-годишниот сириски бегалец Џабер ал Бакр по дводневна потрага откако беше откриен експлозив и опрема за производство на бомби во неговиот стан во Кемниц. Беше осомничен за планирање напад врз аеродромот во Берлин. Два дена подоцна, беше пронајден обесен во затворската келија.

Хронологија: терористички заговори во Германија

Ансбах, јули 2016

Во јули годинава, „Исламската држава“ ја презеде одговорноста за два напади извршени од баратели на азил. 15 луѓе беа повредени во вински бар во близина на влезот на музички фестивал во баварскиот град Ансбах, откако сириски бегалец активираше бомба. Напаѓачот загина во атентатот.

Хронологија: терористички заговори во Германија

Вирцбург, јули 2016

17- годишен барател на азил вооружен со секира и нож изврши напад во регионален воз кај Вирцбург. Пет лица беа тешко повредени, а напаѓачот беше застрелан од полицијата. Германските власти соопштија дека тинејџерот бил осаменик инспириран од „Исламската држава“, но не бил член на мрежата.

Хронологија: терористички заговори во Германија

Диселдорф, мај 2016

Три осомничени членови на „Исламската држава“ беа уапсени во три германски покраини. Власатите велат дека двете лица планирале да се разнесат со експлозив во центарот на Диселдорф, додека третиот напаѓач и четврто лице кое беше уапсено во Франција, планирале да отворат оган врз случајните минувачи.

Хронологија: терористички заговори во Германија

Есен, април 2016

Полицијата уапси три лица откако бомба повреди три лица во храм на Сиките во Есен. Бомбата беше активирана по свадбена прослава, уништувајќи ја внатрешноста на објектот. За нападот е осомничен 16- годишник кој и се предаде на полицијата, додека уште еден малолетник беше уапсен во неговиот дом.

Хронологија: терористички заговори во Германија

Хановер, февруари 2016

Германката со мароканско потекло Сафиа С. е обвинета за напад со нож врз полицаец на главната железничка станица во Хановер. Оваа 16- годишна девојка била мотивирана од „членови на Исламската држава во Сирија да го изврши нападот“, вели јавниот обвинител Симон Хенрикс.

Хронологија: терористички заговори во Германија

Берлин, февруари 2016

Во неколку одвоени рации низ државата, полицијата уапси тројца Алжирци осомничени за врски со „Исламската држава“ и за планирање терористички напади во Берлин. Покраинското јавно обвинителство вели дека постоеле „конкретни“ планови за напад во главниот град.

Хронологија: терористички заговори во Германија

Оберурсел, април 2015

Локалната велосипедска трка беше откажана откако полицијата откри дека е можна цел на исламски терористички напад. Еден 35-годишен маж со турско потекло и неговата 34-годишна сопруга беа уапсени под сомнение дека планирале напад. Во нивниот дом полицијата пронајде материјал за изработка на бомби.


Следете нѐ