Градоначалникот на Гдањск почина по напад со нож на бина

Според наводи на полицијата, напаѓачот се втурнал на бината поставена за една хуманитарна манифестација во Гдањск и пред очите на стотици луѓе повеќепати го прободел со нож 53-годишниот градоначаник Павел Адамович (на насловната фотографија). Градоначалникот морал да биде реанимиран на лице место, а потоа е префрлен на Универзитетската клиника во Гдањск, каде е извршена итна операција. Неколку часа потоа Адамович ја загуби битката за живот.

Невин во затвор?

Напаѓачот бил совладан на бината од припадниците на безбедносните сили, а потоа уапсен. Властите наведоа дека станува збор за жител на градот кој бил осудуван за повеќе грабежи на банки.

Мотивот на 27-годишниот напаѓач би можел да биде одмазда. Очевидците тврдат дека напаѓачот го зел микрофонот в рака и извикал дека поранешната полска влада, под раководство на Граѓнската платформа (ПО) го затворила и покрај тоа што не бил виновен. „Затоа ќе умре Адамович!“, рекол тој.

Повеќе: Полска: Владејачката партија победи на регионалните избори

Адамович, кој на власт во Гдањск беше уште од 1998 година, до 2015-та и самиот беше дел од ПО. На локалните избори во 2018 година тој беше реизбран на функцијата градоначалник како кандидат на, од негова страна формираното, здружение на избирачи „Сѐ за Гдањск“.