Груевски брои проекти, СДСМ го прашува каде се парите
27 јули 2012
За една година работа на новиот состав на Владата на Никола Груевски вкупно се завршени 380 проекти предвидени со изборната програма на ВМРО-ДПМНЕ.
Премиерот Груевски во денешниот отчет пред јавноста за завршените проекти во минатата година најави дека се почнати 470 проекти кои очекува да завршат во реално време.
Груевски во отчетот истакна дека во време на економска криза владата успеала да воспостави стабилност во македонската економија, не се намалувале плати, пензии, немало масовни отпуштања, а ги наброја трите препораки за старт на пристапни преговори со Европската унија.
„Поради проблемот со името Македонија остана надвор од овие евроатлантски организации, овозможен е претпристапен дијалог кој не ги задоволува нашите аспирации, но е добра можност за приближивање на македонија кон ЕУ“, рече Груевски.
СДСМ: Груевски создаде пералница за пари
Опозициската СДСМ во писмена реакција на денешниот отчет на Груевски, му забележува дека „не дал одговор каде отишле 18 милијарди евра буџетски средства, кои заклучно со 2012 година ги потрошила актуелната власт“.
„Благодарение на погрешните политики во изминатите шест години, Македонија се губи во бесперспективност, стана светски првак во економско-социјална мизерија, се гуши во неликвидност, невработеност и огромна сиромаштија. Загрозени се човековите слободи и права, има недостаток на основни демократски вредности, нема медиумска слобода, а патот кон ЕУ и НАТО целосно е блокиран“, се наведува во реакцијата од СДСМ.
Македонија под водството на ВМРО-ДПМНЕ, обвинува СДСМ, нема ниту една капитална инфраструктурна инвестиција, ниту еден енергетски објект или какво било добро од кое полза ќе видат сите граѓани и генерациите кои доаѓаат.
„Единствено нешто што направи Груевски, според СДСМ, е криминалниот проект и огромната пералница на пари „Скопје 2014-та“ за која на споменици, камен, бронза, фасади и скапи огради само досега потроши 350 милиони евра народни пари. Овој криминален проект до крајот ќе ги чини граѓаните повеќе од половина милијарда евра“, се вели во соопштението.