1. Прескокни до содржината
  2. Прескокни до главната навигација
  3. Кон други страници на DW

Груевски иницира дијалог со опозицијата

11 март 2011

Македонскиот премиер Никола Груевски покрена иницијатива за деблокирање на политичкиот дијалог со опозицијата. Лидерот на СДСМ ја прифаќа поканата.

https://p.dw.com/p/10Xac
Никола ГруевскиФотографија: Petr Stojanovski

Во наредните два до три дена можно е да се одржи лидерска средба меѓу претседателите на владејачката и на најголемата опозициска партија, Никола Груевски и Бранко Црвенковски. Иницијативата за одмрзнување на политичкиот дијалот меѓу власта и опозицијата потекнува од премиерот Груевски и дојде на само 10 минути пред најавената прес-конференција на лидерот на СДСМ. Црвенковски соопшти дека ја прифаќа поканата, но и натаму останува на гледиштето дека за фер и демократски избори е потребен консензус меѓу сите парламентарни партии, измени во изборниот законик, донесување на правила за медиумско претставување, како и закон за медиуми. Шефот на СДСМ соопшти дека како знак на добра волја за забрзување на постапката за распишување вонредни парламентарни избори бил симнат приоритетот за одмрзнување на сметките на А1 ТВ и трите весници.

Mazedonischer Präsident, Branko Crvenkovski
Бранко ЦрвенковскиФотографија: Petr Stojanovski

За претседател на ДИК Извршниот одбор на СДСМ го предложи адвокатот Борис Кондарко, поранешен пратеник. И тоа е знак дека СДСМ не сака да купува време во тактизирање за брзо распишување на изборите, доколку Груевски има храброст и одважност да се соочи со создадени услови за фер и демократско гласање, порача Црвенковски.

Денеска македонското Министерство за правда иницира измена во кривичниот законик, според која кривично ќе бидат казнети партиите и поединци што ќе користат буџетски средства за изборна кампања.

Автор: АЧ/ ГЧ

Редактор: Александра Трајковска