1. Прескокни до содржината
  2. Прескокни до главната навигација
  3. Кон други страници на DW

Грција и Италија под знак „итно“

7 ноември 2011

Министрите за финансии на земјите од ЕУ денеска одржуваат состанок во Брисел. Централна теми на средбата ќе бидат ситуацијата во Грција и во Италија, како и техничката имплементација на Фондот за спас на еврото- ЕФСФ.

https://p.dw.com/p/136IE
Од последната средба на министрите за финансии на ЕУ на крајот на октомвриФотографија: picture alliance/dpa

Министрите за финансии на земјите членки на ЕУ мора да реагираат бргу. Со оглед на хаотичната ситуација во Грција и во Италија, одлуките усвоени на Самитот на ЕУ на крајот на октомври мора да се реализираат што побргу , смета германската канцеларка Ангела Меркел.

„Тоа пред се’ се однесува на планот за заштита од проширувањето на кризата. За тоа прашање би требало бргу да се проверат сите опции“.

Еврокомесарот за економска и монетарна политика Оли Рен вчера уште еднаш го засили притисокот врз Атина. Грција ја изигра довербата на своите партнери во еврозоната и прва направи чекор кон напуштање на заедничката валута. Грчкиот министер за финансии денеска (07.11) ќе мора да ги увери своите колеги од ЕУ дека Грција ги извлекла вистински поуки од актуелните турбуленции.

Германскиот министер за финансии Волфганг Шојбле смета дека основното прашање гласи: „Грција сега мора да донесе јасна одлука - дали е подготвена и дали е во состојба да остане во Европската унија?“.

Griechenland Finanzkrise Regierungssitzung in Athen Finanzminister Evangelos Venizelos
Грчкиот министер за финансии Евангелос Венизелос треба да биде уверлив пред своите колегиФотографија: dapd

Еврозоната не смее да се најде во опасност

Исплатата на нова финансиска помош за Грција се’ уште е под голем знак прашање. Осум милијарди евра ќе бидат исплатени дури откако грчкиот парламент ги усвои предвидените реформи и мерките за штедење. Не останува уште многу време. Најдоцна до средината на декември на Грција и‘ се заканува банкрот, а последиците за европските партнери би можеле да бидат несогледливи.

Претседавачот со групата министри за финансии на еврозоната, Жан Клод Јункер пред денешниот состанок изјави: „Ќе сториме се’ заштитниот бран против ширењето на кризата да го поставиме така за еврозоната да не дојде во опасност од пропаѓање“.

Јункер притоа пред се’ мисли на мерките за оптимизација на Европскиот финансиски штит. Шефовите на држави или на влади на членките на ЕУ одлучија Европскиот фонд за финансиска стабилност да го зголемат на преку 1 билион евра. Главната цел е од кризата да се заштитат други земји и приватните инвеститотри, но како тоа точно ќе го изведат се’ уште не е јасно. На самитот на Г20 во Кан врз Германија беше вршен притисок во решавањето на кризата да помогне со девизните резерви на Сојузната емисиона банка, што таа го отфрли.

Италија под надзор на ЕУ и ММФ

А темпираната бомба и натаму отчукува. Министрите за финансии на ЕУ посебно ги загрижува Италија. Се’ додека во таа земја не биде усвоен веродостоен план за штедење , постои опасност од нејзина капитулација на финансиските пазари. Премиерот Силвио Берлускони во Кан мораше да ги прифати барањата Италија де факто да биде ставена под надзор на Европската Унија и на Меѓународниот Монетарен Фонд.

Уште во текот на оваа недела кон Рим ќе се упати група експерти на Европската унија.

Автор: Мартин Боне/ Симе Недевски

Редактор: Елизабета Милошевска Фиданоска