Грчкиот министер за економија поднесе оставка
27 февруари 2018
Скандалот околу државниот додаток за станарина во Грција се шири. По отказот за заменичката министерка за труд Ранија Антонопулу, оставка поднесе нејзиниот сопруг, министерот за економија Димитриос Пападимитриу (на насловната фотографија). Грчкиот премиер Алексис Ципрас ја прифатил оставката, се вели од кабинетот на премиерот. Набљудувачите сметаат дека Ципрас сега ќе направи реконструкција на владата.
Антонопулу и Пападимитриу годишно добивале по 12.000 евра државен додаток за станарина за станот во атинскиот кварт Колонаки. Премиерот Ципрас вчера ѝ даде отказ на Антонопулу поради тоа што поднесла барање и добивала државен додаток за станарина. Двојката Антонопулу-Пападимитриу важи за една од најимотните грчки брачни двојки, со богатство од речиси три милијарди евра, информираат медиумите повикувајќи се на нивните даночни пријави. Тие го искористиле законот донесен од владата на Ципрас во 2015 година. Со него на сите пратеници и министри им е дадено право на додаток за да можат да изнајмат стан во Атина.
Медиумите критикуваа дека е неморално министрите во тешки времиња за граѓаните да го користат ова право. Грците од почетокот на тешката финансиска криза во 2010 година загубија една четвртина од своите приходи. Речиси секој трет Грк живее на работ на сиромаштија.